Ойрхи Дорнодын амьсгалын замын хам шинж буюу МЕРС /Middle East Respiratory Syndrome/ титэмт вирус цааш тархахаас урьдчилан сэргийлэн Өмнөд Солонгосын холбогдох албаны хүмүүс нэмж олон хүнийг тусгаарлалаа.

Тус улсын Засгийн газар 1360 хүнийг тусгаарласнаа өнөөдөр мэдэгдэв. Энэ нь мягмар гарагт мэдэгдсэнээс хойш 550 орчим хүнийг нэмж тусгаарласан гэсэн үг юм.

Халдвар авсан хүмүүстэй харилцаа холбоотой байсан хүмүүсийг тус улсын Засгийн газар 14 хүртэлх хоногоор тусгаарлаж байна.

Саудын Арабаас Өмнөд Солонгос руу эргэн очсон нэгэн залуу МЕРС-ийн халдвар авсан нь өнгөрсөн сард тогтоогдсон билээ.

Түүнтэй холбоотой байсан хүмүүс уг вирусийн халдвар авсан хүмүүсийн дунд байгаа аж. МЕРС нь хүнд хатгаа үүсгэдэг бөгөөд өнгөрсөн оны хавраас голдуу Ойрхи Дорнодод тархаж эхэлсэн юм.

Өмнөд Солонгосын Эрүүл мэнд, нийгмийн халамжийн яамны мэдэгдсэнээр, халдвар авсан таван тохиолдол нэмж бүртгэгдсэн аж. Ингэснээр халдвар авагсдын тоо 30 болсны хоёр нь нас бараад байна.

Уг титэмт вирусийн тархалтын улмаас олон нийт сэтгэл түгших нь нэмэгдэж байгаатай холбоотойгоор 230 бага сургууль хичээллэхгүй байгаа ажээ.

О.Мөнхдуулга