Монгол Улсын Ерөнхийлөгчийн сонгуульд МАН-аас нэр дэвшигч У.Хүрэлсүх нэр дэвшигчийн үнэмлэхээ гардлаа. Үнэмлэх гардуулах үйл ажиллагааны үеэр түүний хэлсэн үгээс онцлох эшлэлүүдийг хүргэж байна.

1. Улс орон маань цар тахлын хүнд нөхцөл байдалд байна. Тиймээс сонгуулийн зардлыг хэмнэж, аль болох хямд зардлаар энэ удаагийн сонгуулийг зохион байгуулах нь зүйтэй. 
2. Хэрвээ би Монгол Улсын Ерөнхийлөгчөөр сонгогдвол нийгэмд шударга ёсыг бэхжүүлж, хууль бус, ёс бус үйл ажиллагааг таслан зогсооход онцгой анхаарна. 
3. Хүн засагладаггүй. Хууль засагладаг төр улстай болох ёстой гэж үзэж байна.
4. МАН-ын Монгол, АН-ын Монгол гэж байхгүй. Бид нэг л Монгол эх оронтой. Тиймээс ард түмнийхээ эв нэгдлийг нүдний цөцгий мэт хайрлан хамгаалах болно.
5. Монголын иргэн болгон байгалийн баялгаас ижил тэгш хүртэж байх ёстой. Тийм учраас байгалийн баялгийн үндэсний санг байгуулж, улс орныхоо бүтээн байгуулалтыг хийж, иргэддээ баялгийг тэгш хуваарилна.
6. Хүчирхэг эдийн засагтай Монгол Улсыг байгуулахын тулд өнөөгийн Засгийн газар, УИХ-тай хамтран ажиллана.
7. Миний мөрийн хөтөлбөр шинжлэх ухааны үндэслэлд тулгуурласан. Би өөрөө Ерөнхий сайд, Шадар сайдаар ажиллаж байсан учраас улс орныхоо нийгэм эдийн засгийн нөхцөл байдлыг маш сайн мэдэрч байгаа. Тэр ч утгаараа улсын эдийн засаг ямар хэмжээнд байгаа, ард түмэнд маань юу хэрэгтэй байгааг мэднэ. Тиймээс миний дэвшүүлж байгаа мөрийн хөтөлбөр тооцоо судалгаанд түшиглэсэн мөрийн хөтөлбөр.