УИХ-ын дарга Г.Занданшатар өвлийн агаарын бохирдол, утаа түгжрэлээс хүүхдүүдийг хамгаалах талаар боломжит нэгэн гаргалгааг санал болголоо. Тэрээр өвлийн хамгийн бохирдолтой хүнд үе болох 12-1 сард дунд сургуулийн сурагчдыг амрааж хичээлийг зун намрын улиралд шилжүүлэх нэгэн гаргалгааг дэвшүүллээ. Хүүхдүүдийг өвлийн агаарын ид бохирдол, түгжрээний үед амраагаад хичээлийг 7-р сард хааж 8-р сарын 1-нээс эхлүүлдэг болгох нь боломжит хувилбар юм. Утаа түгжрэлийн эсрэг авах арга хэмжээний гарц гаргалгааны боломж үнэндээ хязгаарлагдмал болжээ. Утааг орон сууцжуулах замаар л багасгана. Гэтэл одоогийн нөхцөлд өргөн далайцтайгаар орон сууцжуулж, янданг цөөлөх боломж алга. Түгжрэлийн эсрэг ч хүч мөхөсдөөд байна. Утаа түгжрэл хүүхдүүдэд л хамгийн хүнд тусаж байна. Үүний нэг баталгаа нь хүйтний улиралд ханиад хатгаа маш их тархаж, хүүхдүүд эмнэлгийг дүүргэдэг. Ийм нөхцөлд ирээдүй болсон хүүхдүүдээ хамгаалж тэдэнд л ашигтайгаар гарц гаргалгааг эрэлхийлэх нь зөв зүйтэй юм. Зарим эцэг эхчүүд хүүхдүүд зуны хоёр сар л нар салхинд гардаг гэв. Үнэндээ хамгийн сайхан улирал бол жимс ногоо бүрэн боловсорч дэлгэрсэн намрын эхэн буюу 9-р сар юм. Хичээл 10-р сарын 1-нд орж 12-р сарын 1-нээс хоёр сар амраад 7-р сарын эхэн хүртэл хичээллэх нь бас л нэг хувилбар. Ийнхүү УИХ-ын дарга нэгэн гаргалгааг дэвшүүллээ.