ИЗНН-ынхан 15 жилийн ойгоо тэмдэглэж, ээлжит их хурлаа  хийлээ. Энэ үеэр өнгөрсөн хугацаанд хийсэн ажлаа дүгнэж, намын бодлогоо тодорхойллоо. Намын их хурлын төлөөлөгчид өчигдөр орой үндсэн илтгэлүүдээс гадна зохион байгуулалтын асуудал хэлэлцэж,  ИЗНН-ын даргаар УИХ-ын гишүүн С.Оюун, С.Дэмбэрэл нарыг улираан сонгов. Мөн Элчин сайд асан Ц.Ганхуягийг бас нэг даргаараа сонгосон байна. Тус нам бүтцийн хувьд гурван даргатай байдгаараа онцлог. ИЗНН-ын даргад нийт долоон хүн нэр дэвшин өрсөлдсөнөөс С.Оюун дарга 298, Ц.Ганхуяг 282, С.Дэмбэрэл 240 гишүүний саналыг тус тус авсан байна. С.Оюун тус намыг анх үүсгэн байгуулахаас эхлээд даргаар нь ажиллаж байгаа юм. Ц.Ганхуяг ч мөн намаа байгуулалцсан анхны хүмүүсийн нэг. Харин УИХ-ын С.Дэмбэрэлийн хувьд түрүүчийн их хурлынх нь үеэр энэ намд даргаар ажиллах болсон.  

ИЗНН-ын их хурал өнөөдөр 14.00 цагаас Корпрейд зочид буудлын хурлын танхимд үргэлжилж, Үндэсний зөвлөлдөх хорооны гишүүдээ шинээр бүрдүүлнэ. Мөн нарийн бичгийн дарга нараа сонгох ажээ.

Сүүлийн өдрүүдэд ИЗНН Засгийн газраас гарах уу гэдэг асуудал яригдах болсон. Их хурлын үеэр ч энэ тухай зарим гишүүд хөндөж байв.  Гэвч С.Оюун дарга нь “ИЗНН Засгийн газраас гарах тухай ярих нь эрт байна. Засгийн газар тогтвортой ажиллах нь чухал” гэж байлаа. Түүнчлэн ИЗНН-ыг АН-тай нэгтгэх санаа бодолтой хүн ч цөөнгүй байв. Харин үүнд тус намын удирдлага тоймтой хариу өгсөнгүй.

Б.Баяр

Эх сурвалж: Tumen.mn