Монгол банкны Тэргүүн дэд Ерөнхийлөгчөөр гучаадхан насны залуу гэнэт тодорсон нь УИХ-ын гишүүн асан Н.Ганбямбын хүү Г.Дөлгөөн юм. Төрийн банкны гүйцэтгэх захирлаар ажиллаж байсан Г.Дөлгөөн гэнэт хэн бүхний очоод байдаггүй суудалд тодорсон нь МАН-ын үнэнч зүтгэгч эцгийнх нь нөмөр нөөлөг байсан нь ойлгомжтой. Харин өнөөдөр түүнийг хуулийг байгууллагаас яллагдагчаар татаад байгааг эх сурвалж хэлэв. Яллагдагчаар татсан шалтгаан нь Хөгжлийн банкны асуудалтай холбоотой аж. Энэ тухайд Хөгжлийн банкны нээлттэй сонсголын үеэр Улсын Ерөнхий прокурор Б.Жаргалсайхан, АТГ-ын дарга З.Дашдаваа нар мэдэгдэл хийж, энэ үеэр УИХ-ын гишүүн Т.Доржханд “Хөгжлийн банктай холбоотой асуудалд холбогдсон Монголбанкны тэргүүн дэд захирал Г.Дөлгөөнийг сул, чөлөөтэй яваа”-г шүүмжилснээр олонд ил болж байна.
Тэр өөрөө ч Хөгжлийн банкинд ажиллаж байсан хүн. Монгол Улсын мөнгөний бодлого тодорхойлдог, түүнийг зохицуулдаг Төв банкны Тэргүүн дэд дарга гэдэг гуч гаруйхан настай залууд дэндүү томдсон ажил гэдгийг бүгд мэднэ. Гэтэл МАН-ынхан эцгийнх нь гуйснаар туршлага суугаагүй залуу хүнийг томилсон нь өнөөдөр маш том алдаа болж байгааг үүнээс харж болно.
Түүний 2018 онд Хөрөнгө орлогын мэдүүлгийг харж байхдаа залуу хүн гэхэд яасан эрт хөрөнгөжээ вэ гэсэн бодол төрж суусныг нуух юун. Тухайн жилийн Хөрөнгө орлогын мэдүүлгийг сөхөж харахаар тэр 1.7 тэрбум төгрөгийн орон сууц барилга байгууламжтай бол жилийн орлого нь 247 сая төгрөг гэсэн байдаг. Үүнээс гадна 113 сая төгрөгийн үнэтэй автомашин, 169 сая төгрөгийн үнэ бүхий мал сүрэгтэй аж. Тэр 2018 онд ажлын талбарт гараад 10 жил ч ажиллаагүй байв.
Ажлын талбар дээр гарахдаа эцгийнхээ нэр нөлөөгөөр Хөгжлийн банкинд дэд захирал бөгөөд Эрсдэлийн үнэлгээ, удирдлагын газрын захирлаар ажиллаж, өнөөдөр ийнхүү Монголбанкны Тэргүүд Дэд Ерөнхийлөгчөөр ажиллаж байгаад яллагдагчаар татагдсан аж. Манайханд нэг алдаа байдаг. Манайханд ч юу байхав, МАН-д нэг алдаа байдаг. Тэр нь намдаа үнэнч зүтгэсэн нөхрийн үр хүүхэд, садан төрлийг мэргэжил боловсрол, нас шүд үл харгалзан өндөр дээд албанд томилодог. Эцэст нь нөхөж барахгүй алдаа гаргадаг асуудал байдаг. Өнөөдрийн хувьд Г.Дөлгөөн яг энэ замаар явж байна. Хэрвээ Г.Дөлгөөн хариуцлага алдсан бол ялыг нь эцэг Н.Ганбямба үүрэхгүй гэдгийг санаж явах хэрэгтэй. Аав нь хүүгээ өргөж тэтгэж, өндөр дээд албан тушаалд томилуулж болох ч өмнөөс нь ял үүрэх боломжгүй гэдгийг санах хэрэгтэй. “Сайн эцгийн нэрийг гурав худалдаж иддэг” гэдэг дээ. Харин нэрийг нь буруу зүйлд гаргаад байх нь тохиромжгүй юм.
