Дорноговь аймгийн Замын-Үүдийн боомтоор чемоданд хийсэн, муудаж, өтсөн цогцос гаргах гэж байсан талаархи мэдээллийг өмнө хүргэсэн. Анх бидэнд ирсэн мэдээллээр тухайн цогцсыг БНХАУ руу жонш нүүрс ачихаар явж байгаа гэх том оврын автомашинд ачсан байсан гэж байсан.  Харин албаны эх сурвалжаас энэ талаар тодруулахад, 2015 оны тавдугаар сарын 20-ний өдөр Эрдэнэтээс зэсийн баяжмал ачиж Эрээн рүү явж байсан ачаа тээврийн вагоноос цогцос олдсон гэдгийг хэллээ. 

Тиймээс хэрэгт сэжиглэгдэн, саатуулагдсан хүн одоогоор байхгүй, мөрдөн байцаалтын ажиллагаа явагдаж байгаа гэсэн юм. Түүнчлэн өнөөдөр өглөө зарим мэдээллийн сайтаар тухайн цогцсыг чемоданд хийсэн байсныг илрүүлсэн гэх мэдээлэл байсан нь эндүүрэл бөгөөд нас барсан хүн айлд туслах малчнаар ажиллах гэж явж байхдаа барьж явсан чемодан нь цогцосных нь хажууд байсан юм байна. 

Цагдаагийн ерөнхий газрын даргын тушаалаар тус хэрэгт Мөрдөн байцаах газрын дэд дарга, цагдаагийн хурандаа Э.Идэрцогоор ахлуулсан ажлын хэсэг ажиллаж байгаа бөгөөд Төмөр замын цагдаагийн хэлтэст хэрэгт нь Эрүүгийн хэрэг үүсгэн шалгаж эхэлжээ. Талийгаачийн хэн болохыг нь тогтоосон бөгөөд Эрдэнэт хотод амьдардаг 59 настай иргэн Х байжээ. Талийгаач Дархан-Уул аймгийн харьяат боловч Эрдэнэт хотод амьдардаг нэгэн байсан байна. 

Тэрээр  Зүүнхараагийн Түнхэл тосгоны орчимд айлд туслах малчнаар ажиллах гэж байгаад очсон өдрөө болилоо хэмээн явсан талаархи мэдээлэл байна. Улмаар айлаас гарч вагон зам дагуу явснаар тус вагонд орсон байж болзошгүй урьдчилсан нөхцөл байдал тогтоогдоод байгааг албаны эх сурвалж бидэнд мэдээллээ. 

Мөн Эрдэнэтээс Замын-Үүд хүртэл 2-3 хоног явахад тухайн цогцос халуунд муудаж, өмхийрсөн байх гэсэн юм. Шүүх шинжилгээний хүрээлэнгийн задлан шинжилгээ хийсэн урьдчилсан дүгнэлтээр тухайн иргэн гадны нөлөөгүй нас барсан болох нь тогтоогджээ. Нарийн шинжилгээний дүн хараахан гараагүй байгаа юм байна. Дашрамд дуулгахад, 59 настай иргэн Н Дарханаас Эрдэнэтэд шилжиж ирж амьдарч байхдаа архинд дурлах болж, тэнэмэл амьдрал руу нэлээд хэлбийсэн хүн байсан  аж.