Эрүүгийн цагдаагийн газраас кибер гэмт хэрэг болон хуурамч виза карт ашиглан бусдад хохирол учруулсан гэмт хэргийг илрүүлэн шалгаж байгаа талаар

1. 1997 онд төрсөн “Т” гэгч нь компьютерийн мэдээллийн сүлжээнд нэвтрэх зориулалт бүхий тусгай үйлдлийн систем, програм ашиглан мэдээ, мэдээлэл, танилцуулга, онлайн худалдаа, боловсрол, эрүүл мэндийн чиглэлээр үйл ажиллагаа явуулаг веб сайтуудын серверт хууль бусаар нэвтэрч нийт 24783 иргэд, алба хаагч, аж ахуйн нэгжийн мэдээллийн санг хуулбарлан авсан. Мөн бусдын компьютерт байгаа мэдээллийг хуулбарлан авах 12 ширхэг хортой код үүсгэгч програм бэлтгэсэн хэргийг илрүүлэн шалгаж байна.

2. 1985 онд төрсөн “Х” гэгч нь гадаадын иргэдийн виза картын мэдээллийг хууль бусаар ашиглан гүйлгээ хийж бусдад онц их хэмжээний хохирол учруулсан хэргийг илрүүлэн шалгаж байна. “Х” гэгчийн гэрт хийсэн үзлэгээр виза картын бэлдэц, виза картад электрон мэдээлэл байршуулах зориулалт бүхий төхөөрөмж зэргийг хураан авч мөрдөн байцаалтын ажиллагааг явуулж байна.

3. Иргэн Г.Батбаяраас гаргасан өргөдлийг Сүхбаатар дүүрэг дэх цагдаагийн 1-р хэлтсээс шалгаад 2016 оны 05 дугаар сарын 04-ны өдөр Монгол Улсын Эрүүгийн байцаан шийтгэх хуулийн 172 дугаар зүйлийг удирдлага болгон мөн хуулийн 24 дүгээр зүйлийн 24.1 дэх хэсэгт зааснаар тухайн гаргасан өргөдөл нь “гэмт хэргийн бүрэлдэхүүнгүй байна” гэсэн үндэслэлээр эрүүгийн хэрэг үүсгэхээс татгалзах саналтай Сүхбаатар дүүргийн прокурорын газарт материалыг шилжүүлээд байна.

М.Анхболор