Төрийн албыг найз нөхдийн найрааны алба болгож буй үйлдлүүд тасрахгүй үргэлжилсээр.  Тухайлбал, Засгийн газрын Хэрэг Эрхлэх газрын дарга С.Баярцогт л гэхэд саяхан өөрийн сайн найзын төрсөн эгч Г.Ганчимэг гэх эмэгтэйг Эрүүл мэнд, спортын яамны төрийн нарийн бичгийн даргад ямар сонгон шалгаруулалтгүйгээр томилсон гэх мэдээлэл бидэнд ирлээ. Үүнийг тус яамныхан болон С.Баярцогтын ойрын эх сурвалжууд хэлж байна.Цаашилбал, Г.Ганчимэгийг хууль бусаар томилсон байж болзошгүй талаар Төрийн албаны  зөвлөлийн дарга Б.Цогоо УИХ-ын дарга З.Энхболдод саяханы нэг өдөр албан бичиг илгээжээ.

Уг бичигт Г.Ганчимэгийг сонгон шалгаруулалтгүйгээр томилсон байж болохыг дурьдаад уг томилгоог шалгаж өгөхийг хүссэн байна. Уг нь Төрийн албаны хуулиар төрийн өндөр дээд албан тушаалтныг сонгон шалгаруулалтаар томилно гэж заасан байдаг. Гэтэл С.Баярцогт, Г.Ганчимэг хоёрын хэнд ч хууль үйлчилдэггүй бололтой.

С.Баярцогтын үй зайгүй дотны найз, Америкт арав гаруй жил амьдарсан Гомбосүрэнгийн Ганзоригийн эгч Г.Ганчимэг нь яамны Төрийн нарийн бичгийн даргаар очсон даруйдаа ийнхүү хэл ам татлаад ирлээ.

С.Баярцогт нь Г.Ганчимэгийн ах Г.Ганзоригтой олон жил, үерхэж найзалсан баримтууд олон бөгөөд зарим нэг нь хэвлэлийн хуудаснаа шарлаж үлдсэн байдаг. Тухайлбал Г.Ганзориг С.Баярцогт найзынхаа талаар  “Алтан үсгээр бичиж, титэм хийгээд өмсмөөр тийм анд нөхөр минь миний цорын ганц найз гангараа юм” гэж хэлж байсан нь "Соронз" сэтгүүлд гарч байжээ.Тэд гэр бүлийн найзууд бөгөөд хэрэв С.Баярцогт Америкт очвол тэднийхээр заавал буудаг аж. Харин Г.Ганзориг Монголд ирээд буцахдаа С.Баярцогтод байдгаа барин гүйдэг байна. Г.Ганзоригийн хувьд Америкт чулууны үйлдвэр ажиллуулдаг нэгэн аж.

Ямартай ч С.Баярцогтын найзаараа гоёх нь өөрийнх нь хэрэг мэт боловч өргөөнөөсөө халиад төрийн өндөр  албан тушаал  руу найзынхаа төрсөн эгчийг “шахсан” талаарх хэл, ам гарч эхлэв.

Т.Энхэлээ

Эх сурвалж: 24 tsag.mn