Сүүлийн жилүүдэд нийгэмд дуулиан болж, төрийн албан хаагчдын гэрээс, ажлын байрнаас их хэмжээний мөнгө олдсон хэргүүд тасралтгүй гарсаар байна. Хуулийн байгууллагаас энэ төрлийн гэмт хэргийг сүр дуулиантайгаар илрүүлж, олонд зарладаг ч харамсалтай шударгаар хариуцлага тооцож чадаж байна уу гэдэг нь эргэлзээтэй. Энэ сүр дуулиант хэргүүдээс дурдвал УБТЗ-ын Тээвэр зохион байгуулалтын албаны орлогч дарга С.Батдөлийн гэрээс 10 тэрбум төгрөг олдож олны нүдийг бүлтийлгэж, чихийг дэлдийлгэсэн хэрэг гарч байсан ч өнөөдрийг хүртэл шийдэгдээгүй л байна.
Мөн Орхон аймгийн Засаг даргын Тамгын газрын Санхүү, төрийн сангийн хэлтсийн дарга Н.Бямбацэцэгийн гэрээс 700 сая төгрөгийг хураан авч шалгалтын ажиллагаа явагдаж байгаа. Энэ мэтчилэн эрх мэдэл, албан тушаалын байдлаа урвуулан ашиглаж өөрсдийн халаасыг түнтийлгэж дүүргэсэн мөртөө сэтгэл нь ханахгүй гэрээ мөнгөөр дүүрэгдэг болсон жишиг эдгээр хэргүүдээр дуусаагүй бололтой.
Тодруулбал, АТГ-ын мөрдөгчид П.Түвшинжаргалын гэрээс хоёр тэрбум төгрөг олж, 48 цаг цагдан хорьж, шалгаж эхэлсэн байна. Мөн түүний эхнэр СТА “Эрдэнэт” дуу бүжгийн чуулгын дуучин Н.Нямсүрэнг шалгаж байгаа гэнэ. Түүнчлэн П.Түвшинжаргалыг хууль хяналтын байгууллагаас шалгаж эхэлсэн даруйд “Эрдэнэт үйлдвэр”-ийн Ерөнхий захирал Г.Ёндон тушаал гаргаж, үүрэгт ажлаас нь чөлөөлж, оронд нь өөр хүн томилсон гэнэ. Эх сурвалжийн бидэнд өгсөн мэдээллээр “П.Түвшинжаргалыг гэм буруутай эсэхийг тогтоох хүртэл ажлаас нь түдгэлзүүлсэн. Өөрөөр хэлбэл, шүүхээр гэм буруутай эсэх нь тогтоогдож байж дараагийн арга хэмжээг авна. П.Түвшинжаргал гэм буруугүй нь тогтоогдвол буцаад ажилдаа томилогдох боломжтой” гэлээ.
П.Түвшинжаргалын хувьд 2019 онд “Эрдэнэт үйлдвэр”-ийн Үйлдвэрийн бодлогын газрын Ерөнхий уурхайчнаар томилогдож байсан байна. Тус албан тушаалд томилогдохдоо буюу 2019 онд түүний гэр бүлийн орлого нь 20 сая төгрөг, жилийн нийт орлого нь 96 сая төгрөг байжээ. Мөн 629 сая төгрөгөөр үнэлэгдэх амины хоёр орон сууц, зуслангийн байшин нэг, авто зогсоол гурав, авто гарааш нэг, 155 сая төгрөгөөр үнэлэгдэх Lexus, 570-, Toyota, Crown машинтай, 300 сая төгрөгөөр үнэлэгдэх хурдан удмын 10 адуутай, 358 сая төгрөгөөр үнэлэгдэх эзэмших эрхийн хоёр, өмчлөх эрхийн хоёр газартай, 205 сая төгрөгийн үнэт эдлэлтэй, 8.5 сая төгрөгийн хадгаламжтай, Худалдаа хөгжлийн банк, Голомт банканд 98 сая төгрөгийн өртэй, бусдаас 127 сая төгрөгийн авлагатай гэж мэдүүлсэн байна. Харин дээрх албан тушаалд томилогдсоноос нэг жилийн дараа түүний хөрөнгө дараах маягаар өөрчлөгдсөн байна.Тухайлбал, гэр бүлийн орлого нь 215 сая буюу өмнөх оныхоос арав дахин нэмэгджээ. Харин өөрийнх нь орлого 150 сая төгрөг болсон байна. 756 сая төгрөгөөр үнэлэгдэх амины хоёр орон сууц, зуслангийн байшин нэг, авто зогсоол хоёр. Өөрөөр хэлбэл, нэг зогсоол, гараашаа зарсан ч үнэлгээ нь өмнөх оныхоос 120 гаруй сая төгрөгөөр нэмэгдсэн байгаа юм. Машин, газар, үнэт эдлэл хэвээрээ байгаа бол хурдан удмын хоёр адуу худалдаж авсан байх бөгөөд үнэлгээ нь гурван сая төгрөг. Нийтдээ хурдан удмын 12 адуутай болж, үнэлгээ нь 303 сая төгрөг болжээ. Авлагын хэмжээ нэг дахин нэмэгдэж, 202 сая төгрөг болсон, хадгаламжид байсан 8.5 сая төгрөг 0 төгрөг болсон гэж мэдүүлжээ. Иргэн Н.Бямбасүрэн, Худалдаа хөгжлийн банк, Голомт банк, “Тэгш саятан” ББСБ, ЭМПИПИ хадгаламж зээлийн хоршоонд 134 сая төгрөгийн өртэй болсон байна.
Энэ мэт төрийн албан хаагчдын гэрээс их хэмжээний мөнгө олдсон хэргүүдэд хурдан шуурхай арга хэмжээ авч зохих хариуцлагыг нь хүлээлгэхгүй бол эдгээрийн араас хэдэн хурган дарга гэрээ мөнгөөр дүүргэхийг хэн мэдлээ. Хурган дарга нарын гэрээс ийм их хэмжээний мөнгө олдож байгаа юм чинь эдгээрээс дээшээ албан тушаалтнууд нь яаж байгаа бол гэсэн иргэдийн хардлага байгааг нуух юун.
BOLOD.MN
