Засгийн газрын ээлжит хуралдаанаас гаргасан шийдвэрийн талаар мэдээлэл хийлээ. БШУ-ны сайд Л.Энх-Амгалан "Өнөөдрийн Засгийн газрын хуралдаанаар шинжлэх ухааны салбарт хийх реформыг эрчимжүүлэх түүхэн шийдвэр гарч байна. Өмнөх шинэчлэлүүд нь бидний санасанд хүрч чадаагүй. Үүнд маш олон зүйл нөлөөлсөн. Санхүү, шинжлэх ухааны хүрээлэнгийн засаглалын асуудлууд, хүний нөөц, залуу эрдэмтдийг төрөөс хэрхэн дэмжих зэрэг олон асуудлууд тодорхойгүй байсан учир шинэчлэл сайн явагдаагүй. Шинжлэх ухааны салбарын санхүүжилт их ойлгомжгүй явж ирсэн. Зарим хүрээлэнгүүд нь шинжлэх ухааны яамны харьяа, зарим нь шинжлэх ухаан технологийн сангийн харьяа, зарим нь их дээд сургуулиудын харьяа гээд тодорхойгүй явж ирсэн. Тиймээс санхүүжилтийн эх үүсвэрийг ойлгомжтой болгох, Монгол Улсад байдаг шинжлэх ухаан технологийн сангийн санхүүжилтийг ил тод нээлттэй, шударга тогтолцоонд шилжүүлэх шаардлага үүсч байна. Өнгөрсөн 10 гаруй жилийн хугацаанд Шинжлэх ухаан технологийн сангаас нийт 4000 орчим судалгааг 150 орчим тэрбум төгрөгөөр санхүүжүүлсэн дүн байна. Гэвч ийм өндөр дүнгээр хийсэн судалгааны хэд нь эдийн засгийн эргэлтээр орсон, патент болсон, инноваци болсон, бодитой суурь судалгаа болсонг үзэхээр муу үзүүлэлтүүд байдаг. Цөөхөн хэдэн эрдэмтэд, цөөхөн хэдэн судалгааг жил бүхэн санхүүжүүлдэг, ил тод бус, шинжлэх ухааны ЖДҮ гэж хэлж болохоор санг цаашдаа нээлттэй, ил тод, шударга сан болгоно" гэлээ.