Сонгуулийн сурталчилгааны ажил шувтарч буй энэ өдрүүдэд иргэд сонгогчдыг төөрөгдүүлэх агуулгатай гүтгэх гүжирдэх явдал хэрээс хэтэрлээ. Сүүлийн хэдэн өдөрт Монгол Ардын Нам, Нийслэлийн Монгол Ардын Намын удирдлага хоорондоо ярилцсан гэх яриаг бусармаг зорилгоор эвлүүлж монтажилсан бичлэгийг өрсөлдөгч нам, хүчний зүгээс зохион байгуулалттайгаар олон нийтэд түгээж, ор үндэсгүй гүжир гүтгэлгийг тарааж буйг Монгол Ардын Намын Сонгуулийн Төв штабын зүгээс эрс буруушааж, хууль хяналтын зохих байгууллагад энэхүү гүтгэлгийг шалгуулахаа мэдэгдэж байна.

            Дээрх бичлэг нь Нийслэлийн Монгол Ардын Намын дарга Ц.Сандуйгийн бусад нам, улс төрийн хүчнүүд 2012 оны сонгуулийн дараа төрийн албыг хэрхэн бужигнуулж, наймаалцаж байгаа, Ардчилсан намаас сонгуулийн ямар технологи ашиглаж ирсэн талаар хэлсэн танилцуулгын үгнүүдийг нь таслан эвлүүлсэн бичлэг байх ба Сонгуулийн хуулийн 70.1.6, 70.5.1, 70.5.13, Эрүүгийн хуулийн 111, 133, 134, 135,  Гүйцэтгэх ажлын тухай хууль тогтоомж зөрчсөн, сонгогчдыг төөрөгдүүлэх, өрсөлдөгчөө гүтгэх зорилготой гэмт хэргийн шинжтэй үйлдэл мөн.

            Эрх баригчид сүүлийн 4 жилд төрийн мэргэшсэн албыг хэрхэн самарч, төрөл садныхаа, хувийн алба болгон хоорондоо бүлэглэл, фракцаараа наймаалцдаг болсныг иргэд, сонгогчид, төрийн албаныхан хэнээр ч хэлүүлэлтгүй мэдэж байгаа. Төрийн албаны зөвлөл ч төрийн албаны дархлаа алдагдаж, үндэсний аюулгүй байдалд заналхийлж буйг УИХ-д анх удаа сонордуулсан.

Монгол Ардын Нам төрийн мэргэшсэн албыг тогтвортой ажиллуулахын төлөө үргэлж байсаар ирсэн ба сонгуулийн мөрийн хөтөлбөртөө мэргэжлийн засгийн газрыг байгуулж, төрөл садны сүлжээг таслан зогсоохоо мэдэгдсэн байгаа. Өнгөрсөн 4 жилд төрийн мэргэшсэн албан хаагчдыг олон мянгаар нь хомроглон халж сэлгэсэн гэмт нүглээ бусдад тохож өөрсдийгөө хаацайлах гэсэн бусармаг ажиллагаагаа зогсоохыг Ардчилсан намд хатуу сануулъя.

Монгол Ардын нам төрийн мэргэшсэн албыг тогтвортой байлгана. Монгол Ардын нам төрийн албан хаагчдынхаа цалинг хасдаг биш нэмдэг нам билээ.

Хууль бусаар тагнаж чагнах, хийсэн бичлэгээ эвлүүлж монтажлах ажлыг зохион байгуулан сонгогчдыг төөрөгдүүлж байгаа гэм буруутай этгээдүүд удахгүй илэрч, үнэн бодит байдал тогтоогдоно гэдэгт итгэлтэй байна.

            Сонгогч Та бүхэн аливаа гүжир гүтгэлгэнд автахгүй байхыг сэрэмжлүүлэн, мэргэн сонголтоо хийхийг уриалж байна.

МОНГОЛ АРДЫН НАМЫН СОНГУУЛИЙН ТӨВ ШТАБ

2016-06-25