Засгийн толгойд гарсан дал, наяад оны залуус нийгмээ эрүүлээр харж, залуу насны эрч хүчээр зоригтой ажиллаж байгааг дурдах хэрэгтэй. Шил шилээ дарсан үйл ажиллагаа өрнүүлж, өдгөө нүүрсний мафийг илрүүлж, тэдний ажилагааг таслан зогсоохоо нэгэнт зарлачихлаа. Тодотговол, өнгөрөгч долоо хоногт болсон Засгийн газрын хуралдаанаар “Эрдэнэс Тавантолгой” компанид зургаан сарын хугацаанд онцгой дэглэм тогтоох шийдвэр гаргасан. Өдгөөгийн парламентад нүүрстэй холбогдох цөөнгүй гишүүд байгааг ч эх сурвалжууд дэлгээд эхэлжээ.
Одоогийн байдлаар “Эрдэнэс Тавантолгой” компанийн гүйцэтгэх захирал Б.Ганхуягийг нүүрсний хэрэгт саатуулан шалгаж байгаа учраас түүнийг тойрон хүрээлсэн улстөрчид айдсандаа хөлбөрөн өдөр хоног өнгөрөөж байна. Ямартай ч цагдаа хүний байгууллагынхан маш том хэргийн гол зангилгааг тайлж хөвөхөөр зэхэж байгаагаас харахад парламентаас олон нүүрсчид “дээлээ нөмрөх” нь гарцаагүй. “Эрдэнэс Тавантолгой”-н захирлын хувьд яах аргагүй гишүүд, дарга сайд нарын шахаанд орж хэлмэгддэг талтай. Урьд өмнө тус компанийн захирлаар ажилласан асан Я.Батсуурь ч мөн хэлмэгдэж ял эдэлж байсан удаатай.
Тэгэхээр юуны өмнө “Жижиг” хэмээх Тавантолгойг эзэмшдэг УИХ-ын гишүүн Д.Бат-Эрдэнэ “Эрдэнэс Тавантолгой”-н талбайгаас хэдэн зуун мянган тонн нүүрс хулгайлсан тухай асуудал өнөөдрийг хүртэл шийдээгүй байгааг шийдэх аж.
Мөн “Ажнай” Д.Бат-Эрдэнийн араас УИХ-ын гишүүн Ж.Мөнхбатыг нэрлэж байна. Түүний хувьд 2016-2017 онд Засгийн газрын хэрэг эрхлэх газрын даргаар ажиллаж байхдаа Д.Ариунболдыг “Эрдэнэс Тавантолгой”-н захирлаар томилж, нүүрснээс ихээхэн мөнгө угааж байсан тухай мэдээлэл бий. Д.Ариунболдыг нүүрсний талбайгаас олон мянган тонн нүүрс алдагдсан хэрэгт баривчлан шалгаж байгаад хэрэг замхарсан. Мөн түүнд хамаарах олон сая ам.долларын нүүрсний гэрээ ч байдаг. Харин энэ бүхний цаана УИХ-ын гишүүн Ж.Мөнхбат байгааг эх сурвалжууд баталдаг төдийгүй Д.Ариунболдыг ялаас мулталж үлдсэн гэдэг. Ганцхан Ж.Мөнхбат ч биш “Нүүрсний бүлэглэл” гүйцэтгэгч нөхрөө аварсан хэрэг байх.
Тэгэхээр Д.Бат-Эрдэнэ, Ж.Мөнхбат нар зайлшгүй энэ хэрэгт хамаатай учраас тэдний УИХ-ын гишүүний бүрэн эрхийг түдгэлзүүлэн шалгана гэдгийг баттай эх сурвалж хэлж байна. Өдгөөгийн Ерөнхийлөгч У.Хүрэлсүх Ерөнхий сайдаар ажиллаж байхдаа чуулганы хуралдаан дээр Ж.Мөнхбатад хандан “Чамайг нүүрсний хулгайч гэдгийг чинь мэднэ шүү. Чамайг байранд нь тавих цаг нь болжээ” хэмээж байсныг санаж байгаа байх. Тэгэхээр нүүрсний бүлэглэлийг таслан зогсоох арга хэмжээ зөвхөн өнөөдөр ч өрнөж байгаа зүйл биш. Нэлээд эртнээс эхэлсэн учраас энэ бүхэнд бүр мөсөн цэг хатгахаар нэгэнт шийдсэн бололтой.
