УИХ-ын чуулганы үдээс хойшхи хуралдаан эхэллээ. Хуралдаанаар Эдийн засаг, нийгмийг 2016 онд хөгжүүлэх үндсэн чиглэл батлах тухай УИХ-ын тогтоолын төслийн анхны хэлэлцүүлгийг хийж байна. Ингэхдээ уг хуулийн төсөлтэй холбоотойгоор ажлын хэсгээс оруулж ирсэн зарчмын зөрүүтэй 40 гаруй саналын томъёоллоор санал хураалгаж байгаа юм.

Гишүүд одоогоор эхний 10 гаруйг нь санал хураасан ч алт, зэс, нүүрс олборлосон компани ухсан газартаа нөхөн сэргээлт хийхгүй бол төр нөхөн сэргээлт хийнэ гэсэн асуудлыг оруулсан нь шүүмжлэл дагуулсан юм. 

УИХ-ын дарга энэ асуудлыг хөндөж тавьсан бөгөөд хариуцлага өөрсдөө хүлээх ёстой биз дээ. Яахаараа алтны компаниуд газраа ухаад хаячихаар төр нөхөн сэргээлтийг нь хийдэг юм бэ. Энд хариу өгөх хүн байна уу хэмээсэн юм. 

Харин энэ асуултад хариулт өгөх учиртай БОНХАЖ-ын яам, БОХХАА-н байнгын хорооноос хүн байгаагүй учраас хариулт авч чадсангүй. Харин байнгын хорооны саналыг танилцуулсан УИХ-ын гишүүн А.Тлейхан  нөхөн сэргээлт хийлгэхэд анхаарал хандуулна гэж ойлгосон гэсэн юм. 

Харин УИХ-ын гишүүн С.Оюун нинжа нарын болон социализмын үед ухаад орхичихсон талбай зөндөө байгаа. Эзэн холбогдогчгүй тохиолдолд төр нөхөн сэргээлт хийж байгаль орчноо хамгаалахаас өөр аргагүй гэсэн хариулт өглөө. Харин Су.Батболд гишүүн төр энийг дэмжээд явах ёстой. Нөхөн сэргээлт хийх асуудлыг зайлшгүй тусгах ёстой. Болохгүй бол тэр газрыг нь ухсан компаниудыг олох ёстой. 

Тухайлбал, Заамарт тийм газар олон байна гэсэн юм. Харин УИХ-ын дарга эзэнгүй орхигдсон гэж болохгүй. Талбай болгон эзэнтэй байгаа. 1990 оноос өмнөхийг төр хариуцаж болно. Бусдыг нь А лицензтэй хүмүүс нь хариуцаад явах ёстой гэсэн саналыг УИХ-ын дарга гаргалаа. 

УИХ-ын гишүүн С.Оюун эзэнгүй орхигдсон гэдгийг нь хасчихъя. Дараа нь эздийг нь хайна уу, яана хамаа алга гэсэн хариулт өглөө. Ингэснээр 18 дахь саналын томъёолоор уг асуудлыг Уул уурхайн талбайд олборлолт хийсэн талбайд нөхөн сэргээлт хийлгүүлэх хэмээн өөрчиллөө. Өөрөөр хэлбэл, эздийг нь олж, эсвэл 90 оноос өмнөхөд төр нөхөн сэргээлт хийхээр болж өөрчиллөө.  Саналын томъёололын асуулт хариулт үргэлжилж байна.