"Эрдэнэс Тавантолгой” ХК-ийн Төлөөлөн удирдах зөвлөлийн 2021 оны дөрөвдүгээр сарын 20-ны өдрийн № 21/03 тоот тогтоолоор 2020 оны цэвэр ашгаас нэгж хувьцаанд 357 төгрөгийн ногдол ашиг тараахаар байсныг өөрчилж, нэгж хувьцаанд 535  төгрөгийн буюу нийт 28.1 тэрбум төгрөгийг хувьцаа эзэмшигчиддээ ногдол ашиг болгон тараахаар боллоо.

Энэхүү ногдол ашиг авах эрхтэй хувьцаа эзэмшигчдэд 2021 оны дөрөвдүгээр сарын 21-ний өдрөөс эхлэн "ҮЦТХТ" компаниар дамжуулан ногдол ашиг тараахаар болсон тухай Монголын хөрөнгийн биржээс мэдээллээ.

“Эрдэнэс Тавантолгой” компани хөрөнгийн зах дээр “Эрдэнэс” бонд гаргаж, хоёр их наяд төгрөгийн санхүүжилт татахаар эхний ээлжийн арилжаа өнгөрсөн сард хийгдсэн билээ. 1072 хувьцааны дансаа нээлгэсэн хүмүүсийн тухайд шинээр данс нээлгэх шаардлагагүй, нээлгэсэн дансандаа мөнгөө байршуулж, арилжаанд оролцох боломжтой болохыг хөрөнгийн зах зээлийн мэргэжилтнүүд хэлж байгаа юм.

“Эрдэнэс Тавантолгой”-н бонд 24-36 сарын хугацаатай, нэг бүр нь 100 мянган төгрөг болон 100 ам.долларын нэрлэсэн үнэтэй. Тус компанийн борлуулалт өндөр хэмжээгээр өсвөл 1072 хувьцаа эзэмшиж байгаа хүний ногдол ашиг мөн өснө. Тиймээс экспорт өсөх тутам Монголын эдийн засагт эерэг нөлөө үзүүлэх нь тодорхой тухай эдийн засагчид мэдээлсэн билээ.