Нийслэлийн удирдлага, увайгүй, үеэ өнгөрөөсөн улс төрчдийн зүгээс хууль, тогтоомжийг уландаа гишгэлж, оюутан залуусын басамжлан доромжилж, оюутны суралцах эрхийг бүдүүлгээр зөрчсөн үйлдэл нь энэхүү МЭДЭГДЭЛ-ийг хийхэд хүргэлээ.

    Нэг. Оюутнуудын эрх ноцтой зөрчигдөж, МОХ-ны нэр хүндэд халдлаа.

2015 оны 10 дугаар сарын 22-ны өдөр НИТХ-аас гаргасан хууль бус шийдвэр нь оюутны хууль тогтоомжоор олгогдсон эрхийг бүдүүлгээр зөрчиж, оюутнуудад олон сая төгрөгийн хохирол учруулж, нийтийн тээврийн хэрэгслээр зорчих эрхийг нь 2 сар хассан үйлдлээ хаацайлах журам гаргасан нь ирээдүйрүүгээ нулимсан арчаагүй үйлдэл боллоо.

Нийслэлийн засаг дарга Э.Бат-Үүл болон бусад эрх мэдэл бүхий улс төрчид хэвлэл, мэдээллийн хэрэгслэлээр үйл ажиллагаа хууль, журмын дагуу явуулж байгаа МОХ-ны нэр хүндэд халдсан, МОХ-ны удирдлагыг гэмт хэрэгтэн мэт, шүүгдэгч мэтээр зарлаж, ташаа мэдээлэл өгсөн нь байгууллага, хүний эрхийг бүдүүлгээр зөрчлөө.

Иймд МОХ болон МОХ-ны удирдлагын зүгээс нэр төрөө сэргээлгэхээр шүүх, хяналтын байгууллагад хандахаа илэрхийлж, Нийслэлийн Засаг дарга Э.Бат-Үүлийг МОХ-оо болон нийт оюутан залуусаас уучлалт гуйхыг ШААРДАЖ байна.

    Хоёр. Оюутны эрхийг хамгаалж чадаагүй үйлдэлдээ хариуцлага хүлээнэ.

    МОХ нь үүсэн байгуулагдаж, үйл ажиллагаа явуулсаар ирсэн 72 жилийн түүхэндээ олон мянган ажлуудыг хийсэн нь эх орны хөгжлийн суурь бодлогын хэсэг болж, уураг тархи, хүний нөөцийн бүтцийг бүрдүүлж чадсан гавъяатай.

МОХ-ны Ерөнхийлөгч нь МОХ-ны дүрэм, Монголын нийт 117.000 оюутны өмнө хүлээсэн үүргээ хариуцлагатайгаар биелүүлэх нь нэр төрийн баталгаа байдаг. Гэвч улс төрчдийн увайгүй үйл, хүч түрсэн шийдвэрээр оюутны суралцах эрхийг хязгаарлаж, боомилох ажиллагааг таслан зогсоож, эсэргүүцэж чадаагүй үйлдэлдээ МОХ-ны Ерөнхийлөгчийн хувьд Монголын нийт оюутнуудаас хүлцэл өчиж байна.

Иймд МОХ-ны Ерөнхийлөгчийн хувьд МОХ-ны дүрэмд заасан хариуцлагыг хүлээхэд бэлэн байгаагаа үүгээр МЭДЭГДЭЖ байна.

Гурав. Оюутны өмнө тулгамдсан асуудал бүрийг Чуулганаар хэлэлцүүлнэ.

Монгол орны ирээдүй болсон оюутан залуус өөрсдийн өмнө тулгамдсан бүхий л асуудлаа Монголын оюутны эрх барих дээд байгууллага Оюутны Чуулганаар хэлэлцдэг тул Монголын Оюутны ээлжит бус “Оюутны эрх”-ийн Чуулганыг МОХ-ны дүрмийн дагуу 2015 оны 10 дугаар сарын 25-ны өдөр хуралдуулахаар шийдвэрлэснийг МЭДЭГДЭЖ байна.

2015 оны 10 дугаар сарын 23-ны өдөр.

Улаанбаатар хот.

“Монголын оюутны холбооны дүрэм”-ийн 2.2 дахь заалтыг үндэслэн ТУШААХ нь:

    Нэг. Монголын Оюутны холбооны ээлжит бус “Оюутны эрх” чуулганыг 2015 оны 10 дугаар сарын 25-ны өдөр зохион байгуулсугай.

    Хоёр. Чуулганыг мандатын  комиссыг нэгдүгээр хавсралтаар байгуулсугай.

    Гурав. Монголын “Оюутны эрх” чуулганаар дараахь асуудлыг хэлэлцсүгэй. Үүнд:

• Оюутны өөрөө удирдах байгууллагын хөгжлийн чиг хандлага

• Оюутны талаарх төрөөс баимталж буй бодлогын үр дүн, хэрэгжилт

• Их дээд сургуулиудын сургалтын чанар, сургалтын орчин

• Гадаадад суралцаж буй оюутан суралцагчдын эрх ашгийг хамгаалах асуудлууд

• Оюутны нийтийн тээврийн хөнгөлөлт, үйлчилгээ

• Оюутны дотуур байрны хүрэлцээ хангамж

• Оюутны эрүүл мэнд, амьдрах орчин

Дөрөв. Чуулганыг товлосон хугацаанд зарлан хуралдуулж ирцийг бүрдүүлэхийг Гүйцэтгэх хороонд, чуулганд идэвхитэй оролцохыг оюутны холбоо, зөвлөлийн тэргүүн, дарга нарт үүрэг болгосугай.

ЕРӨНХИЙЛӨГЧ                Д.БАТБАЯР