Монгол улс энэ онд “Дэлхийн ур чадварын тэмцээн”-ий 69 дэх албан ёсны гишүүн болсон бөгөөд  энэхүү үйл явдлын хүрээнд Монгол Улсын Хөдөлмөрийн яам “Монгол ур чадвар -2014” тэмцээнийг зохион байгуулсан билээ.

Монгол улсын Барилгын мэргэжлийн жишиг сургууль Техник Технологийн Дээд Сургуулийн сурагчид энэхүү тэмцээний сүүлийн шатанд тогооч, мужааны мэргэжлээр түрүүлсэн юм.

Өнгөрөгч лхагва гариг буюу 2015.03.25-ны өдөр тус тэмцээн гагнуурын төрлөөр амжилттай явагдаж ялагчаа тодруулав. 

Энэхүү тэмцээнд Техник Технологийн Дээд Сургуулийн оюутан Лхагвасүрэнгийн Ганцоож  мэргэжлийн ур чадвар, авхаалж самбаагаа сорин өрсөлдөгчөө ялж 2015 оны 8 дугаар сард Бразил улсад болох Дэлхийн ур чадварын олимпод монгол улсаа төлөөлөн оролцохоор боллоо. 

Тэмцээний удирдамжийн дагуу оролцогчид 4 төрлийн 8 цагийн даалгавар хийж гүйцэтгэсэн ба тус уралдаан нь дэлхийн ур чадварын тэмцээний дэг жаягийн дагуу явагдсан.

Л.Ганцоож өмнөх шатны уралдаануудад тэргүүн болон дэд байруудыг эзэлж байсан. Тэрбээр төгсөхөөсөө өмнө Монгол улсын нэр хүндтэй компиануудаас ажлын санал авсан төдийгүй Япон улсын Гагнуурын нийгэмлэгээс мэргэжлээрээ Япон улсад ажиллах ажлын урилга хүлээн авчээ.

Нэмэлт мэдээлэл хүргэхэд “Дэлхийн ур чадвар” Олон Улсын Байгууллага /World skills International/ нь ашгийн бус, олон улсын гишүүнчлэлтэй, 70 гаруй орныг эгнээндээ нэгтгэсэн байгууллага юм.

Тус байгууллага нь “Дэлхийн ур чадварын тэмцээн”-ийг хоёр жил тутамд зохион байгуулдаг бөгөөд эл тэмцээн нь олимпийн наадмаас ч дутахааргүй нэр хүнд, өрсөлдөөнтэй, өндөр түвшинд зохион байгуулагддаг.

Эх сурвалж: ZAluu.com