Сонгуулийн үеийн сурталчилгаанд хэвлэмэл хэвлэл мэдээллийн хуудас, тоо, зай талбайг багасгах асуудал сөхөгдөж байгаатай холбогдуулан хэвлэл мэдээллийн салбарт үйл ажиллагаа явуулдаг, мэргэжлийн эрх ашгийг хамгаалдаг холбоод шаардлага хүргүүлэх талаар байр сууриа илэрхийлж байна.

МСНЭ-ийн дэд тэргүүн З.Боргилмаа хэлэхдээ, "Хэвлэл мэдээлэл гэдэг бол иргэдийн мэдэх эрхийн төлөө ажилладаг, тэр тусмаа сонгуулиар нэр дэвшигч болон улс төрийн намуудын хөтөлбөр, сурталчилгаа бодлого зэрэг мэдээллийг хүртээмжтэй авсан иргэд зөв сонголт хийх магадлал улам нэмэгддэг. Гэтэл манай хууль тогтоогчид сонгууль болгоны өмнө буюу сонгуулийн хуулийн өөрчлөлт болгоноор нэг зүйлийг хөндөж ирсэн нь хэвлэл мэдээлэл сурталчилгааны хоног, зай талбайг багасгах, зардлыг хумих хандлагатай ажиллаж ирсэн.

Энэ удаад ч тухайн асуудал яригдаж байгаа учраас өөрсдийн ажиллах орчин зах зээлээ хамгаалах үүднээс, хамгийн гол нь иргэдийн мэдэх эрхийг хоног хугацаа, зай талбай, зардлыг танах шалтгаар битгий хөндөөч ээ.

Бид мэдээлэл бүхий иргэд зөв сонголт хийдэг гэдэг байр суурийг илэрхийлж байна. Энэ байр сууриа бичгээр, шаардлага хэлбэрээр УИХ дарга болон Ерөнхий сайд, эрх баригч намын удирлагууд, сонгуулийн хуулийн ажлын хэсэгт ажиллаж байгаа Н.Энхболд нарын гишүүдэд хүргүүлэхээр хэвлэлийн хурлыг зохион байгуулж байна.

Цар тахал гэх мэт эдийн засгийн таагүй байдал ХМХ-ийн мэдээлэл, сурталчилгааны зардлыг үлэмж их хэмжээгээр багасгасан. Мэдээллийн салбар санхүүгийн хүнд байдалд орохтой зэрэгцээд төрийн байгууллагууд мөнгө хэмнэлтийн хууль баталж хамтран ажиллах зар сурталчилгааны зардлаа танасан ийм байдалтай олон жил ажиллаж байна.

Манай төр засгийн байгууллагууд төрийн хэмнэлт, төрийн бүтэц данхар байна гэдэг шалтгаанаар өөрсдөөс хамаарах асуудлаараа шалтаглан мэдээлэл, харилцаа холбооны зардлыг удаа дараа танаж ирсэн. Сүүлийн жилүүдэд жишиг болон тогтож байна. Үүн дээр сонгуулийн зардал гэдэг асуудлыг хөндөхдөө хамгийн түрүүнд хэвлэл мэдээллийн байгууллагын зардлыг танах болж байна. Үүнийг хэвлэл мэдээллийн байгууллагууд болон МСНЭ эсэргүүцэж байна.

Хэвлэлийн тэр дундаа хэвлэмэл мэдээ, уламжлалт мэдээллийн зардлыг танах нь эх сурвалжгүй, баталгаагүй, хяналтгүй сошиал орчинд оруулж хаяснаараа үр дүнд нөлөөлөхүйц таагүй үр дагаврыг авч ирэх эрсдэлтэй байна. Сонгууль бол зөв мэдээлэл дээр үндэслэх ёстой. Хэвлэмэл мэдээллийн хуудас тоог танаснаар сурталчилгааны зардал 50 хувь буурна гэдгийг бид үндэслэлгүй гэж үзэж байна" гэлээ.