Гаднын зочид гийчдийн бэлэг сэлт гүн утга, билэгдэлийг агуулдаг. Энэтхэгийн Ерөнхий сайд Нарендра Модигийн Гандантэгчинлэн хийдэд зочлохдоо бэлэглэсэн бодь мод нь ариун нандин үйлийн билэгдэл болж буй ажээ. Халуун дулаан уур амьсгалд илүү цохицсон бодь мод нь удам бор модны төрөлд тооцогддог. Манайхан өвөрмөц сайн чанарын модыг билэгшээдэг уламжлалтай. Нарендра Модигийн бэлэглэсэн бодь модны суулгацыг одоогоор Гандантэгчинлэн хийдийн хамба лам Д.Чойжамцын өрөөнд залж, тэнд нь арчилж тордож байгаа аж. Манай улсын хэмжээнд энэхүү мод нь хэд хэдэн газарт байдаг юм байна. Тухайлбал, Төрийн ордонд 2-3 ийм мод ургаж байна. Хар өнгийн хальстай, өндөг хэлбэрийн том навчтай, мөнх ногоон энэ модыг Энэтхэгчүүд сайн сайхан бүхний билэгдэл болгодог ажээ.
Б.Баяр
Эх сурвалж: Tumen.mn
