Монгол, Оросын хувь нийлүүлсэн төмөр зам гэж нэг ихэс дээдсийн халаасаа зузаалдаг газар байх болжээ. Энэ байгууллагыг толгойлох гэж хүсэж тэмүүлэхээс ч өөр аргагүй ахуй хангамж, асар их мөнгө урсдаг газар бололтой. Ямар сайндаа л “Төмөр замын вант улс” хэмээн нэрийдэж байхав дээ.
Тэгвэл тус вант улсын Монгол, Орос дарга хамтран “Газрын тосны үйлдвэрийн төмөр замаас урамшуулал” нэрээр 790 сая төгрөг хувааж завшсан гэх мэдээлэл байна. Ойлгож байгаагаар бол Монгол Улсад айсуй 2025 онд ашиглалтад орох Дорноговь аймгийн Алтанширээ сумын нутагт баригдаж байгаа Газрын тосны нэрэх үйлдвэр гэж ганцхан үйлдвэр бий.
Тус үйлдвэр рүү 20 гаруй километр төмөр замыг өнгөрөгч 2020 онд ашиглалтад оруулсан. Үүнийг ашиглалтад ороогүй үйлдвэр нэг ч удаа ашиглаагүй нь ойлгомжтой. Ашиглалтад ороогүй үйлдвэр тэр замаар юу зөөх билээ. Тэгэхээр Улаанбаатар төмөр замын дарга нар ашигладаггүй замаас ямар замаар урамшуулал хэмээн 790 сая төгрөг завшиж байгааг ойлгох юм алга. “Газрын тосны үйлдвэрийн замаас” хэмээн тодотгож байгаагаас харвал Монгол Улсад барьж байгуулж байгаа цор ганцхан үйлдвэр нь энэ юм шүү дээ.
