Улсын ерөнхий прокурорын газраас олны анхаарал татсан хэргүүдийн талаар албан мэдээлэл өгсөн. Энэ үеэр Баянхонгор аймгаас УИХ-д шинээр сонгогдоод буй А.Адъяасүрэнг мөрдөн шалгаж байгааг дуулгасан. Тэгвэл эрхэм гишүүн “Сонгуулийн үеийн улстөржилтийн нэг асуудал бол энэ юм. Төрийн эрх мэдлийн төлөөх тэмцэл үргэлжилж байна гэж харж байна. Сонгууль дууссан. Үнэн зөв нь тогтоогдох байх. Намайг яллагдагчаар татаагүй" хэмээн байр сууриа илэрхийлсэн нь олныг цочоож орхилоо.
Учир нь Улсын прокурорын ерөнхий газраас мэдээлж байгааг Хууль тогтоох дээд байгууллагын нэг гишүүн нь үгүйсгэж байгааг юу гэж ойлгох вэ. Монгол Улсын шүүх хүчин, мөрдөж шалгах байгууллага ийн худлаа мэдээлдэг болсон хэрэг үү, эсвэл УИХ-ын гишүүн нь худлаа ярьдаг болов уу гэх эргэлзээнд орж байна. Ийнхүү Прокурорын газраас А.Адъяасүрэнг мөрдөн шалгаж байгааг дурдах үеэр эх сурвалжууд “эрхэм гишүүн бусдад авлига өгсөн хэргээр шалгагдаж байгаа” гэдгийг ч дуулгаж байв.
Бизнесийн салбарт 20 гаруй жил ажилласан түүнд алдаа, оноо дүүрэн л байгаа байх. Тэр тусмаа манай нөхцөлд бизнес явуулахад гар цайлгахгүйгээр ажил урагшаа явах нь ховор учраас бусдын гарыг хүндрүүлсэн байхыг үгүйсгэхгүй. Зарим сурвалжид дурдахдаа А.Адъяасүрэн гишүүн нь нүүрс тээврийн “С” зөвшөөрөл авахын тулд Авто тээврийн үндэсний газрын албан тушаалтанд 100 мянган ам.доллар өгсөн байж болзошгүй гэх хэргээр шалгагдаад өдгөө хэрэг нь Прокурорын газарт шилжээд байгаа аж. Гэтэл өөрөө Хууль тогтоох дээд байгууллагад сонгогдон ажиллаж байгаа гээд цаашид үйл явдал нэлээд адармаатай болж мэдэх юм.
Хамгийн гол нь Төрийн эрх барих дээд байгууллагад ажиллаж байгаа хүн Прокурорын байгууллагынхаа мэдээллийг үгүйсгээд сууж байгаа нь УИХ-ын гишүүний бүрэн эрхдээ найдав уу, эсвэл мэлзэхээр шийдэв үү. Уг нь Прокурорын удирдлагуудыг УИХ-аар хэлэлцэн томилдог томоохон албан тушаал. Худлаа мэдээллэх нь бүү хэл худлаа ч инээж болохгүй байгууллага, албан тушаал юм.
Тэгэхээр А.Адъяасүрэн гишүүн УИХ-ын гишүүний халдашгүй бүрэн эрхэд найдан ийнхүү бүхэл бүтэн байгууллагыг гүтгэж суугаа байх. Хууль зөрчсөн хэн ч бай хариуцлага хүлээдэг гэдгийг юуны өмнө ухамсарлах хэрэгтэй. Бүрэн эрх нь хэвээрээ хэрэгжиж байсан Ж.Эрдэнэбат гишүүн өдгөө яллуулчихсан хоригдож байна. Түүний бүрэн эрх нь хэвээрээ байгаа гэдгийг санах хэрэгтэй.
Монгол Улсын хууль хүчний байгууллага гэмт хэрэг өдүүлээгүй хэнийг ч болов мөрдөн шалгадаггүй гэдгийг хаа хаанаа мэдэх биз ээ. Гэтэл түүний хэргийг мөрдөн шалгаад хэргийг хянуулах шатанд буюу Прокурорт шилжүүлсэн гэхээр тэр гэмт хэрэг өдүүлсэн нь тодорхой харагдана.
Түмэн.мн
