Өнгөрөгч нэгдүгээр сард Засгийн газрын тэргүүнээр Л.Оюун.Эрдэнэ томилогдсон цагаас хойш Монгол Улс Ерөнхий сайдтай сайдгүй эсэх нь мэдэгдэхээ болилоо. Уг нь тэр УИХ-ын чуулганы хуралдаанаас чамгүй өндөр буюу 87.9 хувийн саналаар Гүйцэтгэх засаглалын тэргүүн болж байв. Тэрээр цар тахал, эдийн засгийн гээд чамгүй хүнд үед засгийн эрхийг авсан ч үүний эсрэг ямар ч арга хэмжээ авалгүй гурван сарын нүүр үзлээ. Тайзан дээр нэртэй сайн дуучин дуулсны дараа уран сайханч гарч ирээд дуулахаар үзэгчид сонсдоггүй шиг У.Хүрэлсүхийн дараа Ерөнхий сайд болсон Л.Оюун-Эрдэнийн байгаа эсэхэд ч анхаарч байгаа хүн алга. Гэвч тэр Гүйцэтгэх засаглалын тэргүүний хувьд тулгамдсан үед бодит арга хэмжээ авч явах ёстой биз дээ. Засгийн газраас иргэн бүрт 300 мянган төгрөг өгснөөс өөр нийгэм эдийн засагт нөлөөлөх ямар ч шийдвэр тогтоол гаргасангүй. Өөрөөр хэлбэл Л.Оюун-Эрдэнэ дэндүү хөнгөдөж жижигдэж байгааг Монгол Улсын нийгмийн нүүр царай удаа дараа харууллаа. Тэгэхээр бид энд зааж зөвлөх гэсэнгүй, гагцхүү нэн тулгамдаж байгаа зарим асуудлыг хөндөж байна.

Нэгдүгээрт

Цар тахлын халдварын тоо, нас баралт нэмэгдлээ. Энэ хэрээр дэлхийд халдвар, нас баралтын тоогоор тэргүүлэх болов. Гамшгийн хэмжээнд хүрсэн цар тахлыг таслан зогсоох дорвитой арга хэмжээ алга байна. Тухайлбал, дархлаажуулалтын ажил удааширснаас үүдэлтэйг мэргэжилтнүүд хэлэв. Энэ нь цэвэр Засгийн газрын ажлаа хийж чадахгүй байгаагийн нэгээхэн жишээ юм.

Хоёрдугаарт

Эдийн засагт сөрөг нөлөөлөл бий болж, инфляцын түвшин урьд өмнө байгаагүй өсөж, иргэдийн амьдралд хүнд туслаа. Гурван зуун мянган төгрөг өгсөн нэрийн дор өссөн инфляцаа хазаарлах арга хэмжээг давхар зохион байгуулаагүйгээс үүдэлтэй гэдгийг эдийн засагчид хэлсэн юм.

Гуравдугаарт

Монгол Улсын экспортын гол нэрийн бүтээгдэхүүн төдийгүй манай эдийн засгийг тэтгэж байдаг нүүрсний экспорт зогслоо. Үүнд засгаас тохирсон арга хэмжээ авахгүй бол элгээрээ хэвтэхэд бэлэн болжээ.

Дөрөвдүгээрт

Засгийн газрын бүтэц, харъяа агентлаг газрын дарга нарын дийлэнх нь үүрэг гүйцэтгэгчээр ажиллаж байна. Тэдний зарим нь таван жил түр орлон гүйцэтгэгчээр ажиллаж удаа дараа хууль зөрчиж байхад чимээгүй л байна. Хууль засагладаг орон гэдгийг мэдрүүлэх ажиллагааг Засгийн газраас сүүлийн гурван сард харсангүй. Энэ бол эмгэнэл. 

Тавдугаарт

Засгийн газрын бодлогын залгамж чанар алдагдсан. У.Хүрэлсүхийн үед хэрэгжиж байсан шударга ёс, төрийн албан зарчим алдагдсан, олон төсөл хөтөлбөр царцахдаа тулсан гэдгийг мэргэжлийнхэн хэлж байна.

Зургаадугаарт

Газрын тосны үйлдвэр, төмөр замын төслүүд, байгалийн хийн хоолой, Тавантолгойн цахилгаан станц, Эрдэнэбүрэнгийн усан цахилгаан станц зэрэг улс орны хувь заяатай салшгүй холбоотой томоохон төслүүд хэдийгээр нам зогсоогүй ч зарим газарт ажилчдынхаа цалинг тавьж чадахгүйд хүрч үүдээ барихдаа тулжээ.

З.Шатар 

Түмэн.мн