С.Лувсанвандангийн нэрэмжит “Гоо зүйн дээд шагнал”-ын эзэн Улаанбаатар чуулгын бүжгийн багш, бүжиг дэглээч Д.Энхгэрэлтэй цөөн хором ярилцлаа. Тэрбээр ирэх гуравдугаар сард үзэгчдийн хүртээл болох И.Ф.Стравинскийн “Ариун хаврын тахилга” этно балетын бүжиг дэглээчээр ажиллаж байгаа юм.

-И.Ф.Стравинскийн “Ариун хаврын тахилга” ямар агуулгатай бүтээл вэ?

-Орост нэн эртний үед амьдардаг байсан отог омогт урин дулаан цаг ирэхээ больжээ. Тэр үед омгийн настнууд ярилцаж, онгон охиноор тахил өргөхөөр болсон байна. Улмаар сонгогдсон охин өдөр, шөнөгүй бүжиглэсээр амь насаа зориулж буй талаар өгүүлдэг бүтээл юм. Энэхүү бүтээлийг бүжиг дэглээч бүр өөр өөрийнхөөрөө илэр хийлэн гаргасан байдаг. “Ариун хаврын тахилга” бүтээлээ И.Ф.Стравинский анх Орост тавьсан ч үзэгчид төдийлөн хүлээж аваагүй байна. Гэхдээ л хөгжмийн төдийгүй бүжгийн урлагт их шинэчлэлийг авчирсан бүтээл болжээ. И.Ф.Стравинский бүтээлийнхээ санааг зүүдэндээ харсан гэдэг ч судлаачид хамтран ажиллаж байсан хүмүүсийнх нь санаа байж болох юм хэмээн таамаг дэвшүүлсэн байна. Ер нь энэхүү бүтээлийн хөгжим маш гайхалтай сонсогддог. Яг л ертөнцийн хамаг зүйлийг шингээсэн мэт сэтгэгдэл төрүүлдэг юм.

-Энэхүү бүтээлийг өмнө нь манай уран бүтээлчид дэглэж байсан уу?

-АНУ-д амьдардаг Өлзийсайхан балетмейстер анх дэглэж байсан. Энэ удаад бид дэлхийн хэмжээний бүтээлийг үндэсний хөгжимтэй хийхээр бэлтгэж байна. “Ариун хаврын тахилга” бүтээлийг хийх санааг бидэнтэй хамтран ажилладаг Буриад улсын найруулагч өгсөн. Бүтээлийн хөгжмийн зохиолчоор Алтангэрэл, бүжиг дэглээчээр надаас гадна Энхтөр, Баярт нар ажиллаж байна. Ирэх гуравдугаар сард үзэгчдэдээ толилуулна гэсэн төлөвлөгөөтэй.

-Бүжиг дэглэлтийн хувьд ямар онцлогтой бүтээл болох вэ?

-Тухайн бүтээлийг ямар арга, хэв маяг, дэглэлтээр гаргах нь хүн хүнээсээ шалтгаалдаг. Энэ удаагийн бүтээлийн бүжгийг монгол хүн дэглэсэн. Тиймээс монгол араншин, төрх харуулсан бүтээл болно гэж бодож байна.

-“Ариун хаврын тахилга”-ыг этно балет хэмээн тодорхойлсон. Энэ утгаараа уламжлалт байдлыг сонгодогтой хослуулсан шинэлэг бүтээл болох болов уу?

-Би энэ бүтээлийг балет гэж хэлэхгүй. Түүний оронд үндэсний этно хэлбэр дээр хийсэн бэсрэг богино хэмжээний бүжгийн жүжиг байх болов уу гэж бодож байна.

Эх сурвалж: Unen.mn