Насанд хүрээгүй охидын биеийг нь үнэлүүлж, худалдаалсан хэрэгт буруутгагдаад байсан Б.Баатарсүрэн, Д.Ганболд, Д.Эрдэнэчулуун нарын хэргийг Дүүргийн Эрүүгийн хэргийн анхан шатны нэгдүгээр шүүхэд хаалттай хэлэлцлээ.
Хуралдаанаар Б.Баатарсүрэнд 3.6 жил ялыг чанга дэглэмтэй хорих ангид, Д.Ганболдод 3 жилийн ял оноож мөн адил чанга дэглэмтэй ангид ял эдлүүлэх, Д.Эрдэнэчулуунд өмнө нь шүүхээс оноож байсан 400 цагийн албадан ажиллах шийтгэлийг хэвээр үлдээсэн байна.
Тэднийг насанд хүрээгүй этгээдийг биеэ үнэлэхэд татан оролцуулсан, зохион байгуулсан гэх зүйл ангиар буруутгажээ.
Б.Баатарсүрэн нар нь насанд хүрээгүй дөрвөн охиныг Улаанбаатар хотоос Өмнөговь аймгийн Ханбогд сумын “Цагаан хад” гэх газарт орших “Цэцээ гүн” гэх буудалд аваачиж, биеийг нь үнэлүүлдэг байсан болохыг мөрдөн байцаалтын явцад илрүүлсэн байдаг.
Энэ хэргийг өмнө нь анхан шатны шүүхэд хянан шийдвэрлэж Б.Баатарсүрэнд гурван жил, Д.Ганболдод 2.6 жилийн хорих ял оноож, Д.Эрдэнэчулуунд 400 цагийн албадан ажиллах шийтгэл оноосон байдаг. Харин давж заалдах шатны шүүхээс энэхүү хэргийг дахин анхан шатны шүүхэд буцаан хянан шийдвэрлэх шийдвэр гаргаснаар ийнхүү хэргийг дахин шүүлээ.
Эх сурвалж : Photonews.mn
