Нийслэлийн Иргэдийн Төлөөлөгчдийн Хурлын тэргүүлэгчид 2014 оны зургадугаар сарын 26-ны өдрийн хуралдаанаараа замын хөдөлгөөний зохиомол түгжрэлийг бууруулах зорилгоор зориулалтын дугуй түгжигч ашиглах журмыг баталсан юм. Журмын хүрээнд өнгөрсөн хоёрдугаар сард тус үйлчилгээг хэрэгжүүлэгч компаниуд 234.900.000 төгрөгийн орлого олж, үүнээс 19.200.000 төгрөгийг нийслэлийн төсөвт төвлөрүүлсэн аж. Гэвч дээрх шийдвэр нь хууль зөрчсөн болохыг Шударга өрсөлдөөн хэрэглэгчийн төлөө газраас мэдэгдсэн төдийгүй энэхүү арга хэмжээг зогсоох ёстой, төлбөр төлсөн жолооч нар шүүхэд нэхэмжлэл гаргаж, мөнгөн төлбөрөө буцаан авах эрх нээлттэй гэсэн шаардлагыг холбогдох газарт тавьж шүүхэд өгөөд байсан.

Иргэдийн хувьд ч энэхүү ачигч машин болоод дугуй түгжих үйл ажиллагаа нь нэлээдгүй бухимдал дагуулдаг. Ямар нэгэн албан байгууллаг, дэлгүүр, үйлчилгээний газрын гадна зогсоол байдаггүйгээс жолоочид хохирч байна. Хэдхэн минут л зүгсоолгүй газар машинаа үлдээгээд гараад ирэх хооронд машины дугуйг түгжиж, ачаад явах үзэгдэл ердийн болж. Машины дугуй түгжигч нарын арга нь бүр нарийсч буланд нуугдаж жолооч нарыг хальт буугаад явах хооронд л дугуйг нь түгжээд алга болдог болжээ. Бараг л хүнтэй машины дугуйг түгжихээс наагуур юм болох нь. Өөрсдөө л мөнгө олж байвал бусдын ажил төрөл, цаг хугацаа, мөнгө огтхон ч хамаагүй байдаг бололтой. Нийслэлийн замын түгжрэлийг бууруулах зорилоготой уг үйл ажиллагаа мөнгөнд улайрч зорилгоо умартаж байх шиг. Тэгтлээ л замын түгжрэлийг бууруулах гэсэн юм бол албан байгууллага, дэлгүүр, үйлчилгээний газрууддаа зогсоолынх асуудлыг шийдэж өгмөөр юм. Ажил төрлөө амжуулж яваа иргэд, жолооч нараа ингэж шахаанд оруулах арай л биш санагдана.  Энэхүү хэрээс хэтэрсэн дугуй түгжих үйл ажиллагааг зогсоовол яасан юм бэ…

Эх сурвалж: Шуурхай.мн