Нийслэлийн мэргэжлийн хяналтын газраас шинээр барилга барьж буй барилгын компаниудад  шалгалт хийжээ.  Шалгалтанд 630 гаруй барилга байгууламж хамрагдсан бөгөөд дүнг нь саяхан НМХГ-ын даргын Зөвлөлийн хурлаар хэлэлцсэн байна. Үүгээр барилгын норм, хууль, дүрмийг зөрчсөн олон компани илэрчээ. Барилгын зураг төслийн болон хот тосгоны төлөвлөлтийн норм зөрчсөн барилгын компаниудаас гадна Ус сувгийн удирдах газар зэргээс хууль бус зөвшөөрөл олгосон явдал ч гарав. Гэхдээ тус газрынхан бид тусгай зөвшөөрөл олгодоггүй гэж байлаа.

Хяналт шалгалтын ажлын хэсгийнхэн “Тайгам алтай”,“Нийслэл өргөө”, “Илчит солонго”,  “Хурд-2”, “Номин зэрэглээ”  зэрэг 9 компанийн тусгай зөвшөөрлийг цуцлуулахаар боллоо. “Тайгам алтай” компани нь олон сарын турш Шударга өрсөлдөөн хэрэглэгчийн төлөө газартай тэрсэлдэж, шалгалтаар илэрсэн зөрчлөө арилгахгүй, барилгын талбайн хэмжээгээр захиалагч иргэдийг хулхидаж, 500 орчим сая төгрөгийн хохирлоо барагдуулахгүй, сүүлдээ шүүгч нартай хуйвалдан өөрсөддөө ашигтайгаар шийдүүлэхийг оролдсон гэгдэж буй ажээ.

Б.Баяр

tumen.mn