Өнгөрсөн 7 хоногийн амралтын өдөр буюу 2014 оны 11 дүгаар сар 29-нд Монгол-Германы ашигт малтмал,технологийн их сургуулийн “Монгол ухаан, Герман чанар” нээлттэй өдөрлөг зохион байгуулагдав.
Монгол, Германы Засгийн газар хоорондын хамтын ажиллагааны хүрээнд байгуулагдсан тус сургууль нь монголын залуус эх орондоо олон улсын түвшний инженерийн боловсрол эзэмших боломж олгож байна. 2013 оноос сургалтын үйл ажиллагаагаа эхлүүлсэн бөгөөд өнгөрсөн хичээлийн жилд инженерийн бэлтгэлийн анхны элсэлтээ авсан бол энэ жил бакалаврын хөтөлбөрөө эхлүүлээд байгаа ажээ.

Тус сургуульд суралцахын тулд элсэгчид нь байгалийн ухаан / математик, хими, физик/ -ын болон англи хэлний хичээлүүддээ амжилттай суралцсан байх шаардлагатай. Учир нь МГТИС оюутны тоонд бус чанарт анхаарлаа хандуулдаг болохоор харьцангүй өндөр шалгуураар элсэлт авдаг юм байна.

МГТИС нь ирээдүйд Монгол улсын дээд боловсролын шинэчлэлийн загвар сургууль болох, Азийн бүс нутагт инженер технологийн мэргэжилтнүүдийн шинэ үеийг бэлтгэх, олон улсын инжерийн шинжлэх ухааны сайн туршлага, тэргүүлэх стандартыг нэвтрүүлснээр ирээдүйд Монгол улсын эдийн засгийн тогтвортой хөгжлийг дэмжиж чадах ажээ.
ЕБС-ийн ахлах ангийн сурагчид болон тэдний эцэг эхчүүд ,оюутнуудад зориулсан энэхүү өдөрлөг нь тэдэнд сургуулийн талаарх илүү өргөн дэлгэр мэдээлэл авах боломжийг олгосон арга хэмжээ байлаа.

Өдөрлөгийн үеэр МГТИС-ийн багш, профессорууд хүүхэд залууст сургалтын хөтөлбөр болон МГТИС-д суралцахын онцлог давуу тал нь юу байх талаар мэдээлэл өгөв. Түүнчлэн өдөрлөгт оролцогчид сургуулийн хотхонтой танилцах аялал хийж, анги танхим лабораториуд, оюутны дотуур байрыг үзэж сонирхсон юм.
МГТИС ХБНГУ-ын хамтрагч их сургуулиуд болон олон улсын бусад боловсролын байгууллагууд мөн аж үйлдвэр уул уурхайн үйлдвэрүүдтэй нягт хамтран ажиллаж ,оюутнууддаа олон улсын стандартад нийцсэн , шилдэг сайн туршлагад суурилсан сургалтын хөтөлбөрийг санал болгодог ажээ.

Үүнд:

Инженерийн бэлтгэл хөтөлбөр

Уул уурхайн боловсролын инженер

Механик инженер

Хүрээлэн буй орчны инженерийн бакалаврын хөтөлбөрүүд багтдаг.

Энэ нь Монголын анхны кампустай их сургууль бөгөөд Улаанбаатар хотын Налайх дүүрэгт байрладаг. Ирээдүйд Монголын дээд боловсролын шинэчлэлд загвар болох сургууль юм.

Шуурхай.мн