Аймаг нийслэлийн Иргэдийн төлөөлөгчдийн хурлын дарга, Засаг дарга нарын семинарт Ерөнхийлөгч Ц.Элбэгдорж, УИХ-ын дарга З.Энхболд нар оролцож Шилэн дансны тухай хуулийг хэрэгжүүлэх, Засгийн газрын үйл ажиллагааг эрчимжүүлэх, өнөөгийн эдийн засгийн нөхцөл байдал, хямралаас гарах арга замын талаар ярилцсан юм. Орон нутагт зовлон их ажээ. Төсвийн хуваарилалт сайн биш байгаа нь тэдний үгнээс илэрхий байв. Орон нутгийн хөгжлийн сангийн мөнгийг танах ёсгүй гэж тэд хэлж байлаа.
Нийслэлийн хувьд өнгөрсөн онд нэлээд амжилттай ажиллажээ. Өнөөдрийн байдлаар 24 байршилд 34 компани гэр хорооллын дахин төлөвлөлтийн ажлыг гүйцэтгэж байна. Семинарын үеэр хотын захирагч Э.Бат-Үүл ч мөн орон нутгийн төсвийг танасан явдлыг буруушааж байлаа.
Гэхдээ сүүлийн үед нийслэлийн зарим дүүргийн Засаг дарга нартай холбоотой асуудлууд хүчтэй яригдаж байна. Налайх дүүргийн Иргэдийн төлөөлөгчдийн хурлаар Засаг даргаа огцруулах шийдвэр гаргасан ч хотын захирагч Э.Бат-Үүл тодорхой алхам хийхгүй байгаа талаар энэ үеэр зарим нь гомдоллож байсан юм. Налайхын МАН-ынхан Засаг даргаа “Нисдэг дарга” хэмээсэн нь олны анхаарлыг татаж байна. Засаг дарга Х.Болдбаатар нь өнгөрсөн хугацаанд 30 гаруй удаа төсвийн мөнгөөр гадаадад зорчжээ. Мөн Баянзүрх дүүргийн Засаг дарга Д.Пүрэвдавааг урьд нь төрд гурван жил ч ажиллаагүй нөхөр хэмээн АН-ын зарим гишүүд нь Захиргааны хэргийн шүүхэд хандаад байгаа юм.
Дүүргийн Засаг дарга нарын дотроос хамгийн олон жил энэ ажлыг хийж буй хүн нь Хан-Уул дүүргийн Засаг дарга Ж.Ганхуяг юм билээ. Тэрбээр 6 жил Засаг даргаар ажиллаж байгаа бөгөөд бас л хэл аманд өртөөд байна. Газрыг хууль бусаар бусдад шилжүүлдэг, эрх мэдлээ хэтрүүлэн нэг хүнд гэр бүлийн хэрэгцээнд хэд хэдэн газар олгодог, аж ахуйн нэгжүүдэд хуулийн хүрээнээс хэтэрсэн том газар өгсөн, төрийн мэдлийн газрыг хувийн хэвшилд хууль бусаар шилжүүлсэн гэх мэт олон баримт сөхөгдөж байна.
Дүүргийн Засаг дарга нарынхаа иймэрүү хуулийн зөрчилтэй үйлдлүүдийг хотын захирагч Э.Бат-Үүл хаацайлж суухгүй нь тодорхой юм. Гэхдээ Э.Бат-Үүлийн хувьд элдэв асуудалд орооцолдсон Засаг дарга нартаа “Та нар өөрсдөө шалгуулаад гэм буруугүй гэдгээ нотлоод ир” гэж байгаа ажээ.
Б.Отгонбаяр
Эх сурвалж: Tumen.mn
