УИХ-ын сонгуульд нэр дэвших үйл явц хуулийн дагуу 27-ны 00.00 цаг хүртэл үргэлжилсэн. МАН болон АН-ын эрх барих байгууллагууд 23.00 цаг өнгөртөл хуралдаж байж нэр дэвшигчдээ хуулийн хугацаандаа багтаж зарласан юм. Тэгвэл үүнтэй зэрэгцэн МАХН-ынхан Бага чуулганаа 23.30 цагт эхэлж хуралдсаар үүрийн 04.00 цагт нэр дэвшигчдээ тодруулж Сонгуулийн тухай хуулийг ноцтой зөрчиж энэ удаагийн сонгуульд МАХН оролцож чадах эсэх нь эргэлзээтэй боллоо. Энэ нь тэдний зүгээс ямар нэгэн байдлаар яаралгүйгээр МАН, АН-ын нэр дэвшигчдийг харгалзан үзэж байгаад хэнийг хаана нэр дэвшүүлэхээ тодруулсантай холбоотой бөгөөд нилээд шилүүн уур амьсгал дунд өрнөжээ, тэгэхдээ бүр хурлын заалнаас нэр дэвшигчдээс бусдыг нь гаргаж байгаад хуралдсан байна. Ингэснээр тэдний нэр дэвшүүлэх үйл явц нь удааширч хуулийн хугацаандаа амжаагүй нь нэгэнт ил болж, өнөөдрөөс сошиал ертөнцөд дэлгэгдэж байгаа юм. Харин эцсийн шийдвэрийг Сонгуулийн Ерөнхий Хорооноос гаргах болно.
Гэтэл үүнээс дутахгүй нэгэн хачирхалтай асуудал өрнөж, өчигдөр твиттер, фэйсбүүк хуудсаны гол ярианы сэдэв болов. Тодруулбал, МАХН-ынхан өрсөлдөгч нараа харж байгаад тодруулах үйл явц нь хэрээс хэтэрч намын генсек Ж.Сүхбаатар нь УИХ-ын гишүүн С.Ганбаатартай зөрж 43-р тойрог буюу хуучин Дарханд дэвшихээр албан ёсны шийдвэрээ гаргажээ. Ингээд бусад намууд мэдээгээ олон нийтэд ил болгочоод байхад МАХН нилээд удсаар үд дундын үед анхны мэдээнүүд гарч эхлэв.
Ийнхүү удах болсон нь Сонгуулиа удирдан лидер болон орох ёстой намынх нь генсектэй холбоотой ажээ. Дарханы хөдөөгийн буюу 45-р тойргоос УИХ-ын гишүүн Д.Хаянхярваагаас, Шинэ Дарханы буюу 44-р тойргоос “босоо Ганбаа”-аас зугтаж, тэрбээр 43 дугаар тойрогт М.Сономпил, Б.Баттөмөр нартай нэр дэвшихээр тооцоолж намын шийдвэрээ гаргажээ. Гэтэл өнөөх “Босоо Ганбаа” нь харин 43-р тойрогт өрсөлдөхөөр болсныг дуулаад сандарч эхэлжээ.
Намын эцсийн шийдвэр нь гарчихсан, мэдээгээ олон нийтэд албан ёсоор дэлгэчихсэн байдаг, гэтэл өнөөх хадны мангаатайгаа таарчихсан байдаг. Харин одоо мань хүн юуны тулд генсек хийж байгаа билээ даргатайгаа хуувилдаж өөрийн гар дор байгаа протоколдоо засвар хийж 44-р тойрог буюу Н.Мөнхдаш, Б.Жавхлан нар руу зугтахаар бичиг баримтаа өөрчлөхөөр зэхэж байгаа гэнэ. Хэрэв ийм тохиолдол гарвал Сонгуулийн хуулийг давхар давхар зөрчиж “ичсэн генсек “НАМ”-аа алахаар шийджээ.
Г.Сүрэн
Эх сурвалж: Zaluu.com
