Пүрэв гарагт Оросын Хар тэнгисийн флотын гол хүч болсон “Москва” байлдааны хөлөг живсэн нь тус улсын зэвсэгт хүчинд томоохон хохирол болсон юм.
Украины тал уг хөлөгт алсын зайнаас пуужингийн цохилт өгсөн гэж мэдээлж байгаа. Харин Оросын тал хөлөг дээр агуулж байсан сум дэлбэрснээс гал гарсан, дараа нь боомт руу чирэх үед шуурганы улмаас живсэн гэж тайлбарлаж байна.
Баасан гарагт Оросын талаас Украины нийслэл Киев хот дахь пуужингийн үйлдвэрт агаараас цохилт өгчээ. Энд үйлдвэрлэсэн пуужингаар "Москва" хөлөгт довтолсон гэж Украины тал мэдээлж байгаа.
Хоёр долоо хоногийн өмнө Оросын цэрэг ухарснаас хойш Киев хот ийм хүчтэй цохилт үзээгүй байсан юм.
“Киевийн нацист дэглэмийн Оросын нутаг дэвсгэрт үйлдсэн аливаа террорист халдлага, хорлон сүйтгэх ажиллагааны хариуд Киевт өгөх пуужингийн цохилтын тоо, цар хүрээ улам нэмэгдэх болно” гэж ОХУ-ын батлан хамгаалах яам мэдэгджээ.
Пүрэв гарагт Украины хилд ойрхон оршдог Оросын Брянск хот агаарын цохилтод өртөхөд 100 орчим орон сууц сүйрч, долоон хүн шархадсан тухай Москвагаас мэдээлсэн юм.
Киевт өгсөн агаарын цохилт нь “Москва” хөлгийг живүүлсэн болон Брянск хотод өгсөн цохилтын хариу арга хэмжээ бололтой.
“Москва” хөлөг сүйрэх үед тус хөлөг дээр үүрэг гүйцэтгэж байсан 500 гаруй усан цэргийн хувь заяа яасан нь тодорхойгүй байна. Оросын тал тэднийг бүгдийг нүүлгэн шилжүүлж чадсан гэж мэдээлж байгаа.
1982 онд ашиглалтад орсон “Москва” хөлгийг 2010 онд шинэчлэн засварлаж байсан юм.
Уг хөлгийг тухайн үеийн Зөвлөлт Украинд үйлдвэрлэж байжээ. Оросын тал дахин ийм хөлөгтэй болоход нэлээд хэдэн жилийн хугацаа шаардана гэж мэргэжилтнүүд үзэж байна.
Учир нь ийм хэмжээний хөлгийг Зөвлөлтийн үед зөвхөн Украинд үйлдвэрлэж байсан, ОХУ-д одоогоор ингэх чадвар байхгүй. Мөн хөлгийн олон эд ангийг эдийн засгийн хоригийн улмаас импортлох боломжгүй болсон.
Одоо Оросын зэвсэгт хүчинд “Москва”-тай нэг түвшний өөр хоёр хөлөг бий ч бүгд Хар тэнгисийн гадна байгаа. Тэдгээрийг Украины дайнд ашиглах боломжгүй юм. Учир нь Турк улс 1936 оны Монрогийн конвенцоор хүлээсэн үүргийнхээ дагуу Хар тэнгист Оросын байлдааны хөлгүүдийг нэвтрүүлэхийг хориглоод байгаа.
Пүрэв гарагт Оросын цэргийн түүхч, сөрөг хүчний улс төрч Андрей Зубов “Оросын яруу алдар Украины эргийн ойролцоо шатаж байна. Хэчнээн усан цэрэг амиа алдаж, тахир дутуу болсныг би мэдэхгүй” гэж сошиал хуудсандаа халаглан бичжээ.
Түүний талийгаач эцэг Зөвлөлтийн үед “Москва” болон өөр хэд хэдэн байлдааны хөлгийг үйлдвэрлэх төсөлд оролцож байсан адмирал юм.
Эх сурвалж: Reuters, AFP
