“Дэлхийн мисс”-ийн тэмцээнд эх орноо төлөөлөн өрсөлдөх шилдэг оролцогчийг тодруулдаг “Miss World Mongolia-2014” тэмцээнээс ямар ч шагнал гардаж чадалгүй хоцорсон мисс И.Төгсөө ялагдлын өмнө бууж өгөөгүй. Тус тэмцээний тэргүүн миссээр тодорсон Т.Батцэцэг “Miss World-2014” тэмцээнд оролцож байгаа энэ үед мисс И.Төгсөө “Miss Earth-2014” тэмцээнд амжилт гарган, шилдэг найман оролцогчийн нэгээр шалгарсан билээ.

Эх орондоо болон олон улсад зохиогдсон хэд хэдэн тэмцээнд амжилттай оролцож, арвин туршлага хуримтлуулсан мисс бүсгүйг чухам юуны учир “Дэлхийн мисс”-т явуулахаас татгалзсан юм бол... Үүнтэй холбогдуулан элдэв мэдээлэл хэвлэлийн хуудсаар тархсан ч, мисс И.Төгсөө “Miss Earth-2014” тэмцээнээр өмнөх амжилтаа ахиулан сэтгэл дүүрэн буцаж ирсэн.

Харин тэрбээр өчигдөр тун их бухимдалтай байгаа төдийгүй сэтгэл нь хэрхэн шаналж, гомдлын нулимс унагасан талаараа өөрийн цахим хуудсанд бичжээ. Учир нь мисс бүсгүйг нүдэндээ давхраа хийлгэж, жин нэмсэн учраас “Дэлхийн мисс”-т оролцуулахаас татгалзсан гэх мэдээлэл олныг шуугиулж байгаа. Мөн түүний өмнө их аварга Д.Дагвадорж өвдөг сөхрөн, харцаар нь "бөмбөрдөг" тухай ярианд багагүй бухимдаж, ийнхүү дургүйцлээ илэрхийлсэн аж.

Мисс бүсгүйг уг тэмцээнд оролцохоос өмнө “Чинээлэг эрхэмтэй ханилж, хүүхэдтэй болсноо нууцалж явна” гэх мэдээлэл олны чихийг дэлдийлгэж байсан удаатай. И.Төгсөө өөрийн хүсэл зорилгодоо хүрэхийн төлөө энэ хүртэл олон тэмцээнд оролцсоноор “Миссийн тэмцээнүүдийг алгасдаггүй” хэмээн буруутан мэт чичлүүлэх учиргүй гэжээ.

Эх сурвалж: Dorgio.mn