Афганистан Улсад явагдаж буй НАТО-ийн тэргүүлсэн “Шийдвэртэй дэмжлэг” ажиллагаанд АНУ-ын зэвсэгт хүчинтэй хамтран үүрэг гүйцэтгэх Монгол Улсын Зэвсэгт хүчний Цэргийн хамгаалалтын ротын I дүгээр ээлжийн цэргийн багийн  бүрэлдэхүүн тус улсыг зорихын өмнө Жанжин туг, Бүх цэргийн Их хар сүлдэндээ хүндэтгэл үзүүллээ. Энэ арга хэмжээнд ЗХЖШ-ын дэд дарга, хошууч генерал Б.Баярмагнай, БХЯ-ны Стратеги, бодлого төлөвлөлтийн газрын дарга хурандаа Г.Сайханбаяр, АНУ-аас Монгол Улсад суугаа Элчин сайдын яамны дэргэдэх Батлан хамгаалахын атташе дэд хурандаа Крис Ди Сикко болон ЗХЖШ-ын удирдах бүрэлдэхүүн, үүрэг гүйцэтгэх цэргийн багийн бие бүрэлдэхүүн тэдний ар гэрийн төлөөлөл оролцсон байна. 

НАТО-гийн хүчний тэргүүлсэн “Шийдвэртэй дэмжлэг” ажиллагааны үндсэн зорилго нь Афганистаны үндэсний аюулгүй байдлыг хангах хүчний үүрэг гүйцэтгэх чадавхийг нэмэгдүүлэх, сургаж дадлагажуулах, ажиллагааны дэмжлэг үзүүлэхэд чиглэж буй аж.  Энэхүү ажиллагаанд НАТО-гийн гишүүн болон түнш орнуудын цэргийн алба хаагчид үүрэг гүйцэтгэх юм байна. 

Афганистан Улсад явагдсан, АНУ-ын тэргүүлсэн “Тогтвортой эрх чөлөө” ажиллагаа дуусгавар болж, НАТО-гийн хүчний тэргүүлсэн “Шийдвэртэй дэмжлэг” ажиллагаанд АНУ-ын зэвсэгт хүчинтэй хамтран үүрэг гүйцэтгэх Цэргийн хамгаалалтын ротын I ээлжийн бие бүрэлдэхүүн ажиллагааны өмнөх сургалт, бэлтгэлээ хангаж,  газар орон дээр нь очиж үүрэг гүйцэтгэхэд бэлэн болжээ. 

Б.Баяр 

Эх сурвалж: Tumen.mn