Сонгуулийн тухай хуульд зааснаар намуудаас болон бие даан нэр дэвшигчдийн материал хүлээн авах ажиллагаа өнөөдөр дуусч байгаа билээ.
Одоогоор Сонгуулийн хорооноос нэр дэвшигчдийн материалыг хянаж байгаа бөгөөд дараахь тохиолдолд нэр дэвшигчийг бүртгэхээс татгалзах зохицуулалттай байна.
- хуульд заасан хугацаанд нэр дэвшүүлэх ажиллагааг явуулаагүй;
- нэр дэвшигчид тавигдах шаардлагыг хангаагүй;
- өөр намын гишүүнийг нэр дэвшүүлсэн;
- нам, эвслийн нэр дэвшүүлэх ажиллагаа энэ хуульд заасныг зөрчиж явагдсан бол нийт нэр дэвшигчийг;
- нэр дэвшигчийг бүртгүүлэхэд шаардагдах энэ хуульд заасан баримт бичиг дутуу, эсхүл хуурамч бол;
- бие даан нэрээ дэвшүүлэгч нь сонгогчдын гарын үсгийг цуглуулахдаа бусдыг төлөөлүүлэх, хүч хэрэглэх, хуурч мэхлэх, заналхийлэх, эд мөнгөөр татах, сонгуулийн эрхгүй этгээдээр гарын үсэг зуруулах, гарын үсэг хуурамчаар үйлдэх зэрэг хууль бус арга хэрэглэсэн, батлагдсан маягтаас өөр маягтаар гарын үсэг цуглуулсан;
- нэгээс илүү тойрогт нэр дэвшсэн;
- сонгуулийн жилийн нэгдүгээр сарын нэгнээс хойш нэр дэвшигчийг бүртгэх хүртэл хугацаанд энэ хуулиар хориглосон үйл ажиллагаа явуулсан;
- бие даан нэр дэвшигчийн сонгуулийн мөрийн хөтөлбөр нь энэ хуульд заасан шаардлагад нийцээгүй.
Нэр дэвшигчийг бүртгэхээс татгалзсан тохиолдолд нам, эвсэл санал авах өдрөөс 25-аас доошгүй хоногийн өмнө зөрчлийг арилгасны үндсэн дээр нэр дэвшигчийг дахин бүртгүүлэх хүсэлтээ уламжлах, эсхүл энэ хуульд заасан журмын дагуу өөр хүний нэрийг дэвшүүлэн шаардагдах баримт бичгийг сонгуулийн төв байгууллагад ирүүлэх боломжтой юм байна.
Эх сурвалж : Nekh.mn
