УИХ-ын сонгуулиар АН олон суудал авч, шинэ засгийг байгуулсан. Мөн Н.Алтанхуягийн Засгийн газар солигдож, Ч.Сайханбилэг энэ засгийг удирдаж байгаа. Засаг солигдож, удирдлагууд өөрчлөгдөхдөө зэрэгцээд хамгийн их хохирдог хүмүүс бол төрийн мэргэшсэн албан хаагчид. Тэр намын хүн, энэ намынх гэх зэргээр төрийн албан хаагчдыг албан тушаалд томилж, халж сольж буй нь дээд цэгтээ хүрч, нийтийн сонсгол хийхэд хүрсэн юм. Сүүлийн үеийн мэдээллээр Байгаль орчин, ногоон хөгжил, аялал жуулчлалын яам, Хөдөлмөрийн яам, Эрүүл мэнд, сплортын яамд төрийн албан хаагчдыг ажлаас чөлөөлсөн, халаа солио их хийж байна гэж шүүмжилж байлаа. Эдгээр салбарын сайд нараас Өргөдлийн байнгын хорооноос иргэдийн хүсэлтийн дагуу тайлбар авсан.

2012 онд төрийн алба 148 мянган хүнтэй байсан бол одоо 183601 болж өссөн юм. УИХ дахь МАН-ын бүлгээс төрийн албан хаагчдыг үндэслэлгүйгээр нэмэгдүүлж байна гэдгийг шүүмжилсэн. Тухайн үед Ерөнхий сайдаар ажиллаж байсан Н.Алтанхуяг төрийн албаныхны тоог нэмэгдүүлэхгүй гэж байсан ч, нэмсэн юм. Энэ бүгдээс болж төрийн албанаас үндэслэлгүйгээр халагдсан иргэдийн нөхөн олговорт зориулж төр 7.8 тэрбум төгрөг гаргахаар болоод байна. Засгийн газар, агентлагийн хувьд 30 мянга орчим хүнийг хөдөлгөж, ажлын байранд нь өөрчлөлт оруулсан байгаа юм. Үүний үр дүнд төр нөхөн олговор олгохоор болоод байна.

Засгийн газрын бүтцэд удаа дараа өөрчлөлт оруулснаар төрийн байгууллагуудын хэмжээнд 1500-2000 орчим албан хаагч ажлаас чөлөөлөгдсөн байгаа юм. Энэ мэт төрийн албан хаагчдыг үндэслэлгүйгээр ажлаас нь халж, салбараа мэддэггүй хүнээр улс төрийн томилгоо хийж байгааг иргэд шүүмжилж байна.

Ц.Нандин

Эх сурвалж: Zaluu.com