Монголын рок попын уран бүтээлчдийн дунд ур чадвар, чансаагаараа нэгдүгээрт бичигддэг гэх гитарчин Д.Өлзий-Орших буюу Өөжгий “Пентатоник” наадмын таван удаагийн шагналт, ая зохиогч төдийгүй уран бүтээлээрээ үргэлж тэргүүлэгч байхыг эрхэмлэдэг нэгэн. Үүгээр ч зогсохгүй, мисс эхнэрээсээ авч үлдсэн ганц хүүгээ хэнээс ч дутахааргүй өсгөж яваа сайн аав гэдэг юм билээ. Нэлээд олон жил ганц бие явсан гитарчин залуу маань бүжигчин бүсгүйтэй дэр нэгтгэж, халуун дулаан гэр бүлийн амьдрал цогцлоогоод байгаа.
Тэгвэл гитарчин залууд “Номер нэг” хэмээх албан бус өргөмжлөл нь таалагддаггүй гэдгийг шударгаар илэрхийлсэн аж. Рок попын “акул”-уудтай хамтарч ажиллан, тэдний уран бүтээлээр дамжуулан өөрийн нэрийг таниулж чадсан Өөжгийд зүгээр л “Сайн гитарчин” гэсэн үнэлгээ хэрэгтэй гэнэ. Харин олон жилийн өмнөөс эхлэн рок попын анд найзууд нь түүнийг “Монголын номер нэг гитарчин” гэж баруун солгойгүй ярьж, ам нээх бүртээ сурталчилсаар байгаад ийм албан бус “өргөмжлөл”-тэй болгоод авчээ. Тиймээс өдгөө ажил амьдралын хувьд ид тогтож яваа гитарчин залууд үргэлж “Номер нэг” хэлүүлж, нэрнийхээ өмнө дуудуулж байх нь тийм ч таатай санагдахаа больсон гэнэ лээ.
Б.Содон
