Монгол орон  өнө эртний хосгүй үнэт зүйлсээр баялаг. Тарбозавр батаар буюу манайхны  товчилж нэрлэснээр Т.Батаар хэмээх үлэг гүрвэлийн олдвор  өдгөө дэлхийд  Монголоо таниулж  байна.  Нэн эртний  энэхүү аварга том  амьтны араг яс холын Америк орноос төрөлх нутагтаа ирж, баахан хэл ам, хэрүүл шуугиан  дагуулсаар арай ядан өөрийн гэсэн музейтэй  болоод байгаа. Хуучин Лениний музейн байрыг МАН-ын мэдлээс  авах гэж Соёл, спорт аялал жуулчлалын яам, Төрийн өмчийн хорооныхон  олон сарын  турш  хөөөлдсөн. Эцэст нь тус музейг “Алтжин”-гийн Г.Алтанд нэг тэрбум  төгрөгийн  барьцаанд тавьсан нь илэрч, одоо шүүх цагдаадаа тулаад явж байна.  Төрийн өмчийн хорооноос музейн байрыг хүлээн авахад  дотор талын  хана  туурга нь нэлээд  эвдэрч гэмтсэн байжээ.  Иймээс их засвар хийлгэхээр болсон ч засварын мөнгө нь 2015 оны төсөвт  тусгагдсангүй. Гэтэл одоо тэнд Т.Батаарын араг ясыг  байрлуулчихсан байж байдаг. Халаалтгүй, нурж унахаа шахсан энэ байранд Т.Батаар  тун тав тухгүй байна. Ийм орчинд уг нь байлгах ёсгүй юм. Хүйтэнд үлэг гүрвэлийн араг ясны чанар эрс муудах аюултай.  Өнгөрсөн өвлийг Дархан-Уул аймгийн музейн дулаан байранд өнгөрүүлсэн Т.Батаар зориулалтын гэх музейн байрандаа  ирээд “даарч” байгаад санаа зовох хүн ховор бололтой. Т.Батаарын араас  ирсэн 22 үлэг гүрвэлийн  араг яс мөн тэнд хажууд нь лац ломботой цайрцаг дотроо “дагжин чичирч” буй аж.  Харин Ч.Дариймаа захирал нь цахилгаан халаагуур тавьсан  өрөөндөө халуу дүүгэн суудаг юм байна.

О.Баяр

tumen.mn