Чоно борооноор гэгчээр улс төр бужигнаантай энэ өдрүүдэд зарим нэг “мартагдсан” хүмүүс ил гарах шинжтэй болов. Хэдэн жилийн өмнө төрийн ордонд Г.Баярсайхан гишүүнийг цохиж, боож унагасан хэрэг мандуулаад, удалгүй эхнэрээ эмчлүүлэх нэрээр УИХ-ын гишүүнээс татгалзаж, том улс төрийн өргөөний “тооноор” нь гараад явчихсан У.Хүрэлсүхийг Шадар сайд болох нь гэх яриа чих дэлсэх ажээ. У.Хүрэлсүх цагтаа сайдын сэнтийд заларч явсан нь үнэн боловч өдгөө хүмүүс түүний урьд өмнөх бүтэлгүй явдлуудыг мартаагүй байгаа. Өнөөх Хадгаламж банкаас  14 тэрбумыг хуссан хэргээр шоронд ороод гарсан нөхөртэй төө зайгүй найзалж, Солонгосын казинод нэлээд хэдэн сая төгрөгийг нь мөрийндөө тавиад туучихсаныг мэдэх хүн цөөнгүй бий.  Хэд хэдэн томоохон албан тушаалтанг “Ална” хэмээн агсарч, согтуугаар машин жолоодон төрийн ордын хойд талын авто замын урсгал сөрж давхиад цагдаад журамлагдсан, тэгээд цагдаагийн ажилтны  намалдагийг нээх шахсан зэрэг түүний олон адал явдал цуварна. Саяхан телевизийн нэвтрүүлэгт оролцохдоо тэр  Г.Баярсайхан гишүүнийг цохиж унагаснаа бахархалтай нь аргагүй дурсаад “Хааяа ухамсарын шанаа өгөх бол байдаг л зүйл” гэх маягаар өөрийгөө өмөөрч, бас уучлалт хүсч байлаа. Улс төрд зүтгэж буй бол иймэрхүү зэрлэг балмад байдлаар ярих нь ёс зүйтэй хүний  шинж яавч биш л дээ. Харамсалтай нь тэр энэ бүхнээ ойлгоогүйдээ ч юм уу, эвсэл урьдын адил өнгө мөнгөөр “зодоод” улс төрийн өндөр алба хашиж болно гэж тооцоолоод  тийнхүү Шадар сайдын суудал мөрөөдөөд явж байхыг үгүйсгэх аргагүй биз. У.Хүрэлсүхийн улс төрч болж тоглох хийрхэл дуусаагүй гэж үү. 

Б.Отгонбаяр 

tumen.mn