Дөрвөн настай бяцхан охиноо төрсөн эцэг, хойд ээж нь зодож, хөнөөсөн байж болзошгүй аймшигт хэрэг хоёрдугаар сарын 21-нд Баянзүрх дүүрэгт гарч олныг цочирдуулаад байна.

Энэ хэрэг хэрхэн нийтэд ил болов

Хоёрдугаар сарын 25-нд нэгэн эмэгтэй өөрийн фэйсбүүк хуудаснаа “Миний найз Ө нь дөрөвхөн настай хайрт охиноо 2015 оны хоёрдугаар сарын 21-нд төрсөн эцэг болон хойд эхийнх нь гарт хэрцгий, бусармаг үйлдлээс болоод алтан амийг нь алдчихлаа” хэмээн бичсэнээр уг хэрэг нийтэд ил болсон юм.

Чухам юуны учир дөрвөн настай охин амиа алдав

Өнгөрсөн сарын 18-нд дөрвөн настай охины төрсөн эцэг Т.Цогт, хойд эх Г.Маралмаа нар охиныг Баянзүрх дүүргийн нэгдсэн эмнэлгийн Хүлээн авах тасагт “Хүүхэд шатнаас унаад бэртчихлээ” гэсээр хүргэсэн байдаг. Тухайн өдөр ажиллаж байсан жижүүр эмч н.Сувд-Эрдэнэ болон бусад эмч сувилагч нар охинд үзлэг хийхэд тархиндаа хүнд гэмтэл авсан байдалтай байжээ. Мөн охины биеийн байдал хүнд, ухаангүй байснаас гадна гар, хөл, тохой, нуруу, цавь зэрэг биеийнхээ олон хэсэгт зодуураас үүдэлтэй болов уу гэмээр хөхрөлт, няцралттай байсан байна. Тиймээс Баянзүрх дүүргийн нэгдсэн эмнэлгийн эмч нар ГССҮТ рүү холбогдон тархи, мэдрэлийн нарийн мэргэжлийн эмч нараас тусламж хүссэн аж.

Охин хүнд хэлбэрийн тархины гэмтэлт авсан байжээ

ГССҮТ-ийн Эмчилгээ эрхэлсэн дэд захирал Р.Энхсайханы хэлснээр тухайн өдөр буюу хоёрдугаар сарын 18-нд 13.30 цагт БЗД-ийн нэгдсэн эмнэлгээс ГССҮТ-д дуудлага өгчээ. Уг дуудлагын дагуу гавал тархины мэс заслын эмч нар очиж үзлэг хийн улмаар охинд яаралтай мэс засал хийхээр болсон байдаг. Ингээд охиныг Баянзүрх дүүргийн нэгдсэн эмнэлгээс ГССҮТ рүү тээвэрлэх үйл ажиллагааг  зохион байгуулж, тухайн өдрийнхөө 17:00 цагт охиныг яаралтай хагалгаанд оруулжээ.

Гэтэл охин амьдралд үл нийцэх их хэмжээний тархины бор хальсан доогуурх цус хуралттай, тархины эд их хэмжээгээр няцарсан, хярзан нь урагдалтай, цус харваад 4-5 хоносон байсан байна. Өөрөөр хэлбэл, охин амьдрах ямар ч боломжгүй байсан гэдэг. Гэвч хөөрхий охин үүнээс хойш дөрөв амьдрах гэж тэмцсэн ч ухаан оролгүй байсаар өнгөрсөн сарын 21-нд амьсгал хураажээ.

 “Гомдолгүй…” гэх гарын үсэг зуржээ 

Т.Цогт, Маралмаа нар хоёрдугаар сарын 17-нд буюу охиынг Баянзүрх дүүргийн нэгдсэн эмнэлгийн Хүлээн авах тасагт хүргэж өгөхөөсөө нэг өдрийн өмнө ГССҮТ-д үзүүлсэн байдаг.  Тухайн үед тус эмнэлгийн эмч охиныг хэвтэж эмчлүүлэх шаардлагатай гэсэн боловч тэд “Ямар ч үед гомдол байхгүй. Бид хүүхдээ хэвтүүлэхгүй” хэмээн өрөгөдөл бичиж өгөөд охиныг аваад явсан гэдэг.

Харин тархины хүнд гэмтэлтэй, хэвтэж эмчлүүлэх шаардлагатай хүүхдийг ямар учраас тэдэнд өгч явуулсан болоод ГССҮТ дээр ажилладаг хэрэг бүртгэгч цагдаа яагаад энэ хэргийг бүртгэж, холбогдох арга хэмжээг аваагүй вэ гэх асуулт гарч ирж буй. Тэгвэл энэ талаар ГССҮТ-ийн Эмчилгээ эрхэлсэн дэд захирал Р.Энхсайхан “Хуулийн байгууллага үүнд яагаад анхаарал хандуулаагүй, хэргийг яагаад бүртгээгүй вэ гэдэг нь бидний асуудал биш. Бид ямар ч байсан яаралтай хэвтэн эмчлүүлэх шаардлагатай гэдэг дүгнэлтээ гаргаж өгсөн” хэмээж байв. Магадгүй үүнд охины эцгийн эрхэлж байсан ажил нөлөөлсөн байхыг үгүйсгэх гэх хардлага бий. Өөрөөр хэлбэл, охины эцэг Т.Цогт нь цагдаагийн байгууллагад ажилладаг нэгэн юм.

Т.Цогт гурав дахь амьдралаа Г.Маралмаатай эхлүүлээд байжээ

Дөрвөн настай бяцхан охины төрсөн эцэг болох Т.Цогт нь өдгөө охиныхоо үхэлд буруутгагдан сэжигтнээр татагдаад буй юм. Тэрбээр Шүүх шинжилгээний үндэсний хүрээлэн болон Баянзүрх дүүргийн цагдаагийн II хэлтэст шинжээчээр ажилладаг нэгэн. Түүнийг эл хэрэгт холбогдуулан сэжигтнээр татан шалгах болсонтой холбоотойгоор албан тушаалаас нь түдгэлзүүлээд байгаа аж.

Тэрбээр талийгаач охины ээж Ө-тэй ханилаад 4 жил болсон ч сүүлийн хоёр жил гаруйн хугацаанд Батлах хамгаалахын их сургуульд цуг суралцаж байсан Г.Маралмаа гэх бүсгүйтэй дотносон улмаар охиныхоо ээжээс өрх тусгаарласан байна. Ингээд өнгөрсөн зун 4 настай охиноо өөр дээрээ аван Г.Маралмаагийнхаа хамт түрээсийн байранд амьдрах болжээ.

Гэхдээ энэ бол Т.Цогтын хоёр дахь амьдрал байсангүй. Учир нь тэрбээр талийгаачийн ээжтэй амьдрахаасаа өмнө эхнэр хүүхэдтэй байсан бөгөөд тэднээсээ салж, хүүхдэдээ тэтгэмжийн мөнгө өгдөг байжээ.

ЦЕГ-ын ХМТ-ийн ажилтан, цагдаагийн ахмад Ё.Лхагвасүрэн “Ц-г хамтран амьдрагч эмэгтэй М-ийн хамт бусдын биед хүнд гэмтэл учруулсан гэдэг үндэслэлээр саатуулсан. Ингээд эрүүгийн  хэрэг үүсгэн шалгах шаардлагатай гэж үзсэн учраас  Шүүхийн шинжилгээний үндэсний хүрээлэнд Ц-г албанаас нь түдгэлзүүлэх  хүсэлт хүргүүлээд байгаа. Хохирогч өнгөрсөн сарын 21-ний өдөр гэмтлээ даалгүй нас барсан. Тиймээс   саатуулаад байсан дээрх хоёр хүнд эрүүгийн хэрэг үүсгэн, цагдан хориод байгаа юм” хэмээсэн

Хойд эх Г.Маралмаа гэж хэн байв

Г.Маралмаа нь эрх зүйч мэргэжлээр дээд боловсрол эзэмшсэн бөгөөд талийгаач охины эцэг Т.Цогттой Батлан хамгаалахын их сургуульд хамтдаа суралцаж байсан гэнэ. Тэд 2013 оноос уулзаж эхэлсэн бөгөөд Г.Маралмаа 2014 оны наймдугаар сарын 4-нд өөрийн фейсбүүк хуудасныхаа статусыг Т.Цогттой гэрлэсэн болгож өөрчилжээ. Хосууд энэ үеэс хамтдаа нийтийн байр түрээслэн амьдарч эхэлсэн тухай эх сурвалжууд хэлж байв. Мөн хөршүүдийнх нь хэлж буйгаар Т.Цогт, Г.Маралмаа нар бөө байсан бөгөөд тэд угаа авах үедээ илүү дотноссон байж магадгүй гэв. Мөн нэг хөрш нь тэднээр 700 мянган төгрөгөөр засал хийлгэж байсан гэх.

Г.Маралмаа нь өөрийн фейсбүүк хуудасаа “Hanna Luxury Spa Salon”-д ажилладаг хэмээн бичсэн байсан юм. Тэгвэл тус салоны зүгээс “Hanna Luxury Spa Salon”-д Марал гэдэг ажилтан ажилдаггүй болохыг албан ёсоор мэдэгдэж байна. Өнгөрсөн арванхоёрдугаар сард ажилд орох хүсэлтэй ирж байсан боловч салоноос тавигдсан шаардлага, хамт олны хэм хэмжүүрт нийцээгүйгээс ажилд тэнцээгүй болно” хэмээн албан ёсоор мэдэгджээ.

Т.Цогт төрсөн охинооо хүчирхийлсэн үү

ГССҮТ-ийн эмч нарийн хийсэн үзлэгээр охины хярзан нь урагдалтай байсан гэдэг. Харин Хүүхдийн төлөө үндэсний газрын дарга И.Нарантуяа “Бид Т.Цогтыг төрсөн охиноо хүчирхийлдэг байсан гэх мэдээллийг авсан” хэмээн ярьсан байгаа.  Тэгвэл Шүүхийн шинжилгээний төвд хийсэн задлан шинжилгээний эхний  дүгнэлт хоёрдугаар сарын 27-нд гарчээ. Чухам ямар дүгнэлт гарсан талаар ЦЕГ-ын ХМТ-ийн ажилтан, ахмад Ё.Лхагвасүрэнгээс тодруулахад “Өнөөдрийн байдлаар гарсан эхний дүгнэлтээр охиныг хүчирхийлсэн болох нь тогтоогдоогүй. Иргэдийн дунд сэжигтнийг  шинжээчээр ажиллаж байсан учраас хуурамч дүгнэлт гаргалаа гэх хардлага байж магадгүй. Тиймээс цагдаагийн байгууллагаас уг хэрэг дээр ажиллаж байгаа шинжээч нараас “Ямарваа нэгэн ашиг сонирхлын зөрчилгүй, хуулийн дагуу үнэн зөв дүгнэлт гаргана. Хууль бус дүгнэлт гаргавал хуулийн хариуцлага хүлээнэ” гэсэн  баталгаа гаргуулсан. Мөрдөн байцаалтын ажиллагаа  хэвийн, прокурорын хяналтад үргэлжилж байна. Охиныг үхэлд хүргэсэн  шалтгааны талаарх эцсийн дүгнэлт гараагүй байна. Дүгнэлт гарсны дараа  цаг тухайд нь мэдээлэл өгнө” гэв.

Энд нэг хардлага төрүүлсэн нэг процесс явагдаж байгааг нь дурдах нь зүйтэй байх. Тодруулбал, талийгаач охины амиа алдсан шалтгааныг эцэслэн тогтоогоогүй, задлан шинжилгээний дүгнэлт бүрэн гараагүй байхад зөвхөн хүчирхийлсэн эсэхийнх нь дүгнэлтийг урьтаж гарган улмаар олон нийтэд мэдээлж байгаа нь цаанаа хардлага төрүүлэх… Магадгүй охиныг “Өөрөө өөрийгөө үхэлд хүргэсэн” гэх дүгнэлт гарахгүй гэсэн баталгаа бий юу гэдэг нь эргэлзээтэй…

Охин хажуу айлынхаа бүсгүйгээс тусламж хүсч байжээ, гэвч…

Талийгаач охиныг хойд эх Г.Маралмаа нь түүнийг байнга зодож, дарамталдаг байсан талаар тэдэнтэй цуг нийтийн байранд амьдарч байсан хөршүүд нь ярьсан юм.

/Хөршүүд нь ийн ярьжээ http://www.eagle.mn/content/read/28995.htm/

Тэд охины хамт энэхүү нийтийн байранд өнгөрсөн зунаас хойш саяханыг хүртэл амьдарчээ. Ингээд өнгөрсөн хоёрдугаар сарын эхээр нүүж, холгүйхэн түрээсийн байшин хөлслөн амьдрах болсон байна.

/Сурвалжлагыг http://www.eagle.mn/content/read/28961.htm /

Нийтийн байранд хамт амьдарч байсан хөршүүд нь охиныг байнга зодуулдаг байсан тухай мэдэж байсан хэдий ч “Эцэг нь цагдаа юм чинь дараад л өнгөрнө” хэмээх бодолдоо дийлдэн хүчирхийллийг таслан зогсоогоогүйгээ хэлж байсан. Харин cүүлд амьдарч байсан байшингийнх нь ойр орчимд амьдардаг хөршүүд охиныг хүчирхийлэлд өртдөг эсэхийг нь бүү хэл тэднийг танихгүй, мэдэхгүй хэмээж байв. Хашаанд нь байдаг айлын эзэгтэй хүртэл “Бараг мэдэхгүй, нэг удаа л орж байхыг нь харсан” гэсэн юм.

Охиныг энэ байшингийн шатнаас унасан хэмээжээ

/хамгийн сүүлд амьдарч байсан байшингын зураг/

Т.Цогт, Г.Маралмаа нар энэ охиныхоо хамт энэхүү хувийн байшинг түрээслэн амьдарч байхад эл хэрэг гарсан юм. Харин энэ талаар зарим хэвлэлд нийтийн байранд охиныг шөнө 3 цагийн турш зодож уйлуулаад байхад хөршүүд нь тусламж дуудан цагдаад мэдэгдээгүй талаар дурджээ. Гэтэл уг хэрэг гарсан энэхүү байшин нь нийтийн байр биш юм. Хашаандаа нэг гэртэй хоёр давхар хувийн байшин бөгөөд тухайн үед урд талынх нь гэрийнхэн хөдөө явсан эзгүй таарсан тухай бид мэдээлж байсан билээ.

Т.Цогт охиныг Баянзүрх дүүргийн нэгдсэн эмнэлэгт хүргэж өгөөд ээж Ө-рүү нь утасдаж хэлсэн байдаг. Энэ үед Ө-г /охины төрсөн ээж/ эмнэлэгт ирэхэд охин нь цус харвасан, хамаг бие нь хөх няц болсон байдалтай байсан байна. Харин энэ үед Т.Цогт “Нэг метр гаруйн өндөртэй шатнаас унаад” ийм болсон хэмээн мэлзсэн гэнэ. Энэ талаар Ө-гийн найз бүсгүй өөрийн цахим хуудастаа “Г.Маралмаа нь тухайн үед “Би яана аа, эмч ээ би яана аа” гэх юм асуугаад байж байсан. Хүмүүс Цогт болон түүний эхнэр Маралмаа руу хашгирч дайрахад Цогт түүнийг хамгаалаад “Хэлээ хүрэх газар маргалдаж, Хөлөө хүрэх газар явж заргалд юу ч олж долоохгүй” гэх зэргээр доромжилсон хэмээжээ.

Хүүхэд бүрийн нүдэнд нулимс бус инээмсэглэл тодроосой

Хэрвээ хорооны нийгмийн ажилтан, хэсгийн төлөөлөгч үндсэн чиг үүргийнхээ дагуу айл өрхийн судалгаагааг гарган холбогдох байгууллагуудтай харилцан солилцож уялдаатай ажилласан бол хүчирхийлэл газар авахгүй л байсан. Хүүхдийн төлөө үндэсний газрынханаас хороодын нийгмийн ажилтан, хэсгийн төлөөлөгч нартай хамтран ажиллаж, айл өрхийн мэдээллийг цуглуулан тандалт судалгаа хийж холбоотой ажилладаг эсэх талаар тодруулахад ажил үүргийн чиг баримжаа байхгүй хэмээн хэлсэн юм.

Мөн сүүлийн жилүүдэд хөршийн холбоо гэдэг асуудал бараг мартагдсан. Хөршөө танихгүй хэдэн жил зэргэлдээ амьдрах бол энгийн л асуудал болж. Түүнчлэн иргэд гэр бүлийн хүчирхийлэл дээр “Ходоод хагаравч тогоондоо”, “Эр эмийн хооронд илжиг бүү жороол” хэмээн хойш суусаар энэ мэт хэргүүд тасрахгүй нь. Өнөөдөр иргэн бүр үүргээ ухамсарлах цаг болжээ. Магадгүй та хөршийндөө хэн амьдардаг талаар эргэн нэг бодоод үзээрэй.

Хүүхэд бүрийн нүдэнд нулимс бус инээмсэглэл үүрд тодорч байгаасай.

Эх сурвалж: Г.Даша Eagle.mn