2015 оны төсвийн тодотгол нэлээд хэрүүл шуугиантай хэлэлцэгдэж байна. Энэ талаар манай сайтаас уншигчид маань “Өрийн тааз-хоолойд тээглэсэн яс” бэсрэг өгүүллийг олж харсан байх. Ямартай ч   төсвийн тодотголын эхний хэлэлцүүлэг УИХ-ын нэгдсэн чуулганаар хэлэлцэгдлээ. Ерөнхий сайд Ч.Сайханбилэгийн урьд мэдэгдэж байснаар амаржсан эхчүүд, оюутнууд, алдарт эхчүүдэд олгож байсан тэтгэлгийн мөнгийг өөр эх үүсвэрүүдээс заримыг  нь олгох боломжийн талаар гишүүд санал бодлоо уралдуулж байна. УИХ-ын гишүүдийн цалин хангамжаас хасах талаар ч санал гаргав.  Хамгийн адармаатай нь өрийн тааз. Энэ талаар УИХ-ын гишүүн Б.Бат-Эрдэнэ “Өрийн таазыг 40 хувиас хэтрүүлэхгүй хуулийн заалттай. Хоёр намын гэрээн дээр ч бий. Гэтэл гурван сая дахь иргэн маань таван сая төгрөгийн өртэй мэндлэх болоод байна” гэлээ. Энэ үнэхээр гамшиг  дагуулах үзүүлэлт болов уу. Хэрхэн шийдэхийг харах л үлдлээ. Ц.Нямдорж гишүүн ч мөн өрийн таазыг 70 хувьд хүргэхийн эсрэг хатуу үг унагаад авсан. Тэрбээр “Намууд тохиролцооноос ухарвал МАН нь засгаас гарах чиглэлтэй шүү” гэв.

Б.Баяр

Эх сурвалж: Tumen.mn