Хотын нийтийн тээврийн үйлчилгээг иргэдэд хүртээмжтэй, тав тухтай болгохын төлөө нийслэлийн засаг дарга Э.Бат-Үүл болон түүний багийнхан чадах чинээгээрээ л ажиллаж байна. Өдөржингөө 500 төгрөгөөр зочих боломжийг хүртэл туршиж үзлээ. Удахгүй шинэ он гараад хуучин автобусуудынхаа нэлээд хэсгийг шинэчлэхээр боллоо. Гэвч одоогоор нийтийн тээврийн хүрэлцээ сайнгүй хэвээр байна. Гэхдээ хувийн хэвшлийн зарим аж ахуйн нэгжүүдээс харин шинэлэг санаачлага гарч, “Автобустермонал трейд” компани гэхэд л шөнийн үйлчилгээнд автобусуудаа явуулах болжээ. Энэ тун сайн хэрэг. Их хот маань шөнөжин хөл хөдөлгөөн ихтэй болсон тул ийм үйлчилгээ зайлшгүй хэрэгтэй байлаа. Хотын захиргаа шөнийн тээврийг нь таатай хүлээн авч, “боломжтой юм байна” гээд дэмжиж, цаашдаа ийм үйлчилгээг алдахгүй байхыг хүсчээ.
Мөн саяхнаас “Автотермонал трейд” компани өдөр, шөнийн үйлчилгээг хамтад нь хариуцах болов. Одоогоор тэд 6 автобус үйлчилгээнд гаргаад байгаа аж. Шөнийн үйлчилгээнд дагнаж явах үедээ хоногт 120 орчим мянган төгрөгийн зардал гаргаад үндсэндээ 60 хувийн алдагдал үүрч байсан байна. Аль ч аж ахуй алдалгүй ажиллахын төлөө байдаг. Дандаа алдаад байвал компани дампуурна. Ийм эрсдэлд орохгүйн тулд орлого олох ёстой. Яаж ашиг олох нь тухайн компанийн асуудал. Гэхдээ “Автотермонал”-ынхан нийтийн тээврээс өөрөөр алдагдлаа нөхөх боломжгүй. Иймээс өдрийн цагаар тээвэр хийхээс өөр аргагүй ажээ. Аливаа зах зээл тодорхой судалгаа шаарддаг болохоор тус компанийнхан нийтийн тээврээр үйлчлүүлэгчдийн нөхцөл байдал, автобусын хүрэлцээ зэргийг сайтар судалжээ. Судлаад явтал эцсийн дүнд “Автобус-1” компанийн автобусууд явж буй Нисэх, Долоон буудал чиглэлийн зорчигчид нийтийн тээврийн хүрэлцээ муутайгаас ихээхэн бухимдалтай нь илт байв. Нисэхийн чиглэлд гэхэд “Автобус-1”-ийн дөнгөж 10 орчим автобус явж байгаа нь хаанаа ч хүрэлцдэггүй юм байна. Мөн Долоон буудал руу 10 орчим автобус үйлчилж буй нь иргэдийг нэлээд хүлээлгэдэг, бас дундуур нь хулгайн тээвэр орж хүмүүсийг бүр ч их бухимдуулдаг байжээ.
Хотын захиргаа иргэддээ ээлтэй үйлчилгээ үзүүлэхийн төлөө ажиллаж байгаа тул Тээврийн газраас нь “Автотермонал трейд” ХХК-нийн санаачлагыг дэмжин, шөнийн үйлчилгээний алдагдлаа нөхөж өдрийн цагаар тээвэр хийх боломж олгоход цааргалсангүй. Тиймээс тус компани хамгийн ачаалал ихтэй Нисэх, Долоон буудлын чиглэлд цөөн хэдэн автобусаа явуулж эхэлжээ. Гэтэл “Автобус-1” компанийн удирдлагууд ундууцаж, хориг тээг тавихыг оролдох болов. Өөрөөр хэлбэл, “хоол булаалаа” гэх янзтай. Нийтийн тээврийн компаниуд хэдийгээр ашгийн төлөө ажиллах нь зүйн хэрэг боловч хүмүүсийн эрх ашигт нийцүүлж үйлчлэх ёстой. Автобус хүрэлцэхгүйгээс иргэд хөхөө өвлийн хүйтэнд гадаа даарч зогсох учиргүй. Иймд өөр аль нэг компанийн автобусууд хүрэлцээ муутай чиглэлд үйлчлэхгүй бол болохгүй. Харамсалтай нь “Автобус-1”-ийнхэн даахгүй нохой булуу хураав гэгчээр зам маршрутаа монопольдож, иргэдийг бухимдуулсан хэвээр байхыг хүслээ гэж үү. Үгүй л баймаар. Ийм явцуу эрх ашиг иргэдэд сайн зүйл авчрахгүй нь лавтай. Тиймээс “Автотермонал трейд” компанид элдэв шахалт үзүүлж, дээгүүр доогуур зүсэн бүрийн бичиг цаас барьж гүйн “Энэ компанийн автобусыг манай чиглэлд бүү явуулаач” гэх нь үнэндээ утгагүй юм л даа. Энд зориуд онцлох зүйл гэвэл “Автотермонал трейд” компанийн автобусууд нэмж орж ирсэнээс хойш дээрх чиглэлийн зорчигчид ам сайтай байгаа ажээ.
Tumen.mn
Б.Отгонбаяр
