2016 оны сонгуулийн албан ёсны сурталчилгаа 6-р сарын 11-нд эхлээд 7 хоног өнгөрч байна. Улс төрч гэх ухаантнуудын танхимд нэгдэх гэсэн 484 эрхмүүд ард иргэдийнхээ чихэн дээр цэцэг навч ургуулан гоё ганган үгсээ чулуудсаар, бид нар ч 25 жилийн туршлагаараа тэдний сайхан үгсэнд уярсаар байх уу? Гэрийн хаалга пүд пүд тогшин сурталчилгааны материал, телевиз радио, олон нийтийн мэдээллийн хэрэгслээр зөвхөн сонгуулийн талаарх мэдээ, гудамж зам, зай завсар бүр сурталчилгааны самбаруудтай болсон байна. Тэдний уулзалтандаа ярьж байгаа зүйл нь улс орныг Азийн бар, Дэлхийн Монгол болно, эсвэл МАНАН-г арилгана, маргааш сайхан болгоно гэсэн ганган үгсийн цуглуулгаар дүүрч ядуу сэтгэлгээт ядарсан ард түмнийг мунхруулсаар байна.
Энэ мэт зүйлсийг өнгөрсөн 25 жилийн турш сонсож, 76 эрхмийг төрд илгээсэн ч өнөөдрийн бидний амьдрал улам доройтсоор, Монгол улс 21 аймаг 9 дүүрэгтэй биш 1 аймаг 9 дүүрэгтэй мөдхөн болох мэт.
Бид хэрхэн зөв сонголтоо хийх вэ? Нэр дэвшигч бүрийн танилцуулга, мөрийн хөтөлбөртэй танилцахад хэдэн долоо хоног шаардлагатай дэндүү олон хуудастай байна. Тэгвэл энэ удаагийн УИХ-ын сонгуульд хамгийн олон буюу 14 нэр дэвшигч 65-р тойрог /Чингэлтэй дүүргийн 12,13,14,15-р хороо/, хамгийн бага буюу 2 нэр дэвшигч 32-р тойрог /Увс аймгийн Малчин, Хяргас, Завхан, Наранбулаг, Тариалан, Ховд сум, Улаангом сумын 4, 9, 10, 11-р баг/-т нэр дэвшиж байна. Нам, эвсэл, нэр дэвшигчид Сонгуулийн тухай хуулийн дагуу тогтоосон хэмжээгээр зардал гаргах ёстой бөгөөд хамгийн олон нэр дэвшигчидтэй 65-р тойрог нэг нэр дэвшигчээс хамгийн ихдээ 170 сая, нийт 2 тэрбум 380 сая, хамгийн бага нэр дэвшигчидтэй 32-р тойрог 121 сая, 242 сая төгрөг зарцуулахаар байна. Дээрх мөнгийг мөрийн хөтөлбөр, брошур танилцуулга, телевиз радиогийн захиалгат нэвтрүүлэг гэх мэт иргэдийн тархийг угаах зүйлд л зарцуулдаг нь үнэн.
Энэ олон нэр дэвшигчийн уулзалт, танилцуулга, мөрийн хөтөлбөрөөс сонголт хийхэд хүндрэлтэй нь ойгомжтой. Харин 65-р тойргийн иргэдээс нэр дэвшигчдийн дунд нээлттэй мэтгэлцээн зохион байгуулах санал гарч, зарим нэр дэвшигчид хүлээн авч өөрийн цахим хуудсандаа нийтлэсэн байна.
Энэ тойрог хамгийн олон бөгөөд шинэхэн нэр дэвшигчидтэй гарцаагүй гал гарах тойрог нь мэдээж. МАН Ө.Энхтүвшин, АН Б.Мөнхтуяа, ИЗНН Д.Дашпүрэв, БНН З.Бадамсүрэн, МСДН Ч.Лхагважав, ЭЧХН Л.Өлзийжаргал, МАХөН М.Оюунаа, МАХН Д.Эрдэнэбат, ТТЭНЭ П.Болд, ХСЭ Д.Дондовсамбуу, Бие даагч Б.Найдалаа, Бие даагч Б.Батхуяг, Бие даагч П.Шинжээравдан, Бие даагч Р.Төрмөнх нар өрсөлдөж байна.
Б.Найдалаагийн хэлсэн “Ер нь сонгуулийг төрийн санхүүжилттэй ганцхан нэгдсэн тараах материалтай, өрсөлдөгчдийн дунд мэтгэлцээн зохион байгуулдаг, элдэв илүү ухуулга сурталчилгаа хийж иргэдээ залхаадаггүй хуультай болвол зохино” гэсэн утга агуулга тун сонирхолтой санагдаж байна.
Түүний дэмжсэн мэтгэлцэх саналыг МАН-ын Ө.Энхтүвшин, АН-ын Б.Мөнхтуяа, МАХН-ын Д.Эрдэнэбат нар хүлээж авахыг л хүлээх үлдлээ.
65-р тойргийн нэр дэвшигчидтэй ЭНД ДАРЖ танилцна уу.
