Нийслэлийн цагдаагийн газраас гулгаа массаж нэртэй газрууд буюу саун, массажны газрыг шалгаж байгаа ажээ. Одоогийн байдлаар нийт 13 газрыг шалгасан бөгөөд тус газруудаас зөрчил олноор гарч, биеэ үнэлж мөнгө олдог хэд хэдэн эмэгтэйг саатуулан шалгаж байгаа аж. Тэдний дунд жирэмсэн эмэгтэй ч байсан гэнэ. 

Чингэлтэй дүүргийн цагдаагийн нэгдүгээр хэлтсийн ахлах байцаагч Б.Гүнчин-Ишээс шалгалтын талаар тодруулахад “Энэ сарын 07-ны өдөр “Хяналт” нэгдсэн хэмжээний дор саун, массажны газруудыг шалгасан. Хоёр газар саун, массаж нэрийн дор биеэ үнэлэлтийг зохион байгуулж байгаа нь илрээд эрүүгийн хэрэг үүсгэн шалгаж байгаа. Үүний нэг нь Баянбүрдийн тойргийн урд орших ТОССК-ийн подвалд үйл ажиллагаа явуулж байгаа “Сити” массажны газрыг шалгасан. Манай байгууллага болон дүүргийн эрүүл мэнд, худалдаа, үйлчилгээний газруудтай хамтарсан шалгалт явуулсан. Үйл ажиллагааг нь зогсоосон. Гэтэл түүнээс хойш бидний шаардлагыг үл хайхран ажилласаар өнөөдрийн байдлаар цэсэн дээр байхгүй ч орлогын бүртгэлийн дэвтэр дээр гулгаа массаж хийсэн гэсэн бүртгэлтэйгээр бусад эд мөрийн баримттайгаар үйл ажиллагаа явуулсан нь тогтоогдоод байна. Та бүхэн харж байгаа байх. Гудамж талбай, хаа сайгүй гулгаа массаж гээд биччихсэн байгаа. Гулгаа массаж гэж ямар учиртай массаж вэ гэдгийг хүн бүр сайн ойлгохгүй байгаа. Энэ нь хуулиар зөвшөөрсөн хэм хэмжээ биш. Садар самуунтай тэмцэх тухай хуулиар садар самууныг бодитой сурталчилж байна л гэж үзэж болно.  Нийт саун, массажны 13 газар байгаа. Дөрөв нь ийм гулгаа массаж гэсэн нэртэй. Бүгдийг нь цагдаагийн газраас шалгаж, эрүү үүсгэсэн байгаа. Гэм бурууг нь шүүхийн байгууллага тогтооно” гэв

. Эх сурвалж www.wikimon.mn