Монголын сэтгүүл зүй хэмээх их далайн хамгийн том хөлөг онгоц МҮОНРТ-ийн Үндэсний зөвлөл хуралдаж, уг хөлгийн ахмадаар ажиллаж байсан Ерөнхий захирал А.Бүрэнбаатарыг ажлаас нь чөлөөлжээ. Харин Ерөнхий захирлын Түр орлон гүйцэтгэгчээр Монголын мэдээ сувгийн захирал Р.Гандиймааг томилсон байна. Ийнхүү Үндэсний зөвлөлийн гишүүдийн олонхийн саналаар ажлаасаа чөлөөлөгдсөн захирал асан А.Бүрэнбаатар уг шийдвэрийг эсэргүүцэн, тамга тэмдгээ өгөхгүй гүрийж суугааг бидэнд дуулгав. Тэрээр тамга, тэмдгээ өгөхгүйн зэрэгцээ өөрт ойр уран бүтээлчдийг дарамтлах замаар Үндэсний зөвлөлийг огцруулах гарын үсэг цуглуулж байгаа гэх. Уг нь пүрэв гаригт эхэлсэн Үндэсний зөвлөлийн хуралдаан 13 гишүүнтэйгээр хуралдаж, баасан гаригийн үүрээр өндөрлөсөн байна. Ингэхдээ хуралд оролцсон 13 гишүүний 10 нь МҮОНРТ-ийн нэр бүхий 156 уран бүтээлчийн гаргасан тавдугаар сарын 15-ны өдөр хүргүүлсэн шаардлагыг үндэслэн, “Ажлаа зохион байгуулж чадаагүй, хөдөлмөрийн гэрээний биелэлт хангалтгүй” гэх шалтгааныг хуульд нийцүүлэн ажлаас нь чөлөөлжээ.

Уг нь МҮОНРТ нь огцорсон захирлын санал, хэдэн хүний гарын үсэг цуглуулснаар тарчихдаг бүтэц биш. Учир нь “Олон нийтийн радио телевизийн тухай хууль”-д тодорхой заагаад өгчихсөн хөндөшгүй зүйл. Өөрөөр хэлбэл Монгол Улсын Хууль тогтоох дээд байгуулага Үндэсний зөвлөлийн гишүүдийг томилох эсэх асуудлыг шийддэг тусгай хуультай томоохон асуудал гэдгийг огцорсон захирал мэддэг баймаар юм. Жишээ нь “Олон нийтийн радио телевизийн тухай хууль”-ийн дөрөвдүгээр бүлгийн 21.5.1-д Үндэсний зөвлөлийн гишүүнийг томилох тодорхой зүйл заалт бий. Мянган А.Бүрэнбаатар байгаад ч шийдэх асуудал биш. Тодотговол, Үндэсний зөвлөлийн гишүүнд Ерөнхийлөгч дөрөв, 21.5.2-т УИХ долоон, 21.5.3-т Засгийн газар дөрвөн хүн тус тус санал болгосны эцэст УИХ-аар хэлэлцэн, 15 хүний бүрэлдэхүүнтэй томилдог учиртай. Тэгэхээр А.Бүрэнбаатарын энэ асуудал нь Ерөнхийлөгч, Ерөнхий сайд, УИХ-ын шийдвэрийг эсэргүүцэж байгаа хэрэг болно. Цаашлуулж харвал Монгол Улсын хууль зөрчсөн үйлдэл юм.

Тэгээд ч Үндэсний зөвлөлд хэн дуртай нь яваад орчихгүй. “Олон нийтийн радио телевизийн тухай хууль”-ийн 21.1-д “Үндэсний зөвлөл нь олон нийтийн ашиг сонирхлыг төлөөлөх орон тооны бус байгууллага бөгөөд 15 гишүүнтэй байна” хэмээн заасан. Түүнчлэн хуулийн 21.3-т “Үндэсний зөвлөлийн гишүүнд дараахь этгээдийг нэр дэвшүүлэхгүй” хэмээн заасан. Үүнд “төрийн улс төрийн болон төрийн жинхэнэ албан хаагч”, “улс төрийн намын удирдах албан тушаалтан”, “бусад радио, телевизэд ажиллаж байгаа, түүнчлэн ажилладаггүй боловч хөтөлбөрийн бодлогыг тодорхойлоход нь оролцдог этгээд”, “бусад радио, телевизэд хөрөнгө оруулалт хийсэн этгээд, эсхүл олон нийтийн радио, телевизийн санхүүгийн хараат бус байдалд нөлөөлж болох этгээд”, “Үндэсний зөвлөлийн гишүүнээр ял шийтгэлгүй, иргэний нийгмийн төлөөллөөс санал болгосон Монгол Улсын иргэнийг томилно” хэмээн тус тус хуульчилж өгсөн байдаг.

Түүнийг чөлөөлөх асуудал нь өнгөрөгч баасан гаригт гэнэтхэн шийдсэн асуудал биш. А.Бүрэнбаатарын хувьд 2021 оны гуравдугаар сард томилогдохдоо хийж хэрэгжүүлэхээр ярьж байсан ажил, амлалт, хөдөлмөрийн гэрээнд дурдсан асуудлаа шийдвэрлэж чадаагүй учраас нэлээд эртнээс түүнийг чөлөөлөх асуудал нийт уран бүтээлчдийн дунд байсаар иржээ.

Харин шийдвэр гарсан даруйд захирал асан өөрийнхөө цахим хуудсанд “Хамт олон минь би тамга, тэмдгээ авч зугтаагаагүй шүү. Шөнөжин ажиллаад нойр муутай, ажил хүлээлцэхээ тулгуу мэдсэн учраас цэгцлэх зүйлс нэлээн байна. Ёс төртэй авсан ажлаа нэр төртэйгөөр ирэх даваа гаригт хүлээлгэж өгөхөө Үндэсний зөвлөлийн нарийн бичгийн даргаар дамжуулан ажил хүлээлцэх комиссын дарга М.Наранбаатарт уламжиллаа” хэмээн жиргээд сураг алдарчээ. Гэтэл өнөөдрийг хүртэл тамга, тэмдгээ өгөлгүй гарын үсэг цуглуулан, Үндсэний зөвлөлөө огцруулна хэмээн дэмийрч явна. МҮОНРТ гэдэг их айл бол төрөөс санхүүждэг бөгөөд үндэсний нэгдмэл байр сууриас бодлого, чиглэлээ тодорхойлдог Монголын сэтгүүл зүйн голомт болсон байгууллага. Хэн нэгний хүсэл тачаалаар ажлаа явуулдаггүй, тусдаа хууль дүрэмтэй гэдгийг сануулахад илүүдэх юун.