Ерөнхий сайд асан Н.Алтанхуяг албан ёсоор ажилдаа орж, өчигдөр Төрийн ордонд ирлээ. Ингэснээр тэрбээр бүтэн гурван сарын турш төрийн ажлаас хөндийрснийхөө дараа ийнхүү УИХ-ын гишүүн гэх тодотголтойгоор эргэн ирж байгаа нь энэ. Өөрийнх нь тэргүүлсэн Засгийн газрыг унагасны дараа тэрбээр осолд орж, БНСУ-ыг зориод байсан юм. Тухайн үед түүнийг хүнд бэртсэн гэх мэдээлэл гарч байсан ч өдгөө түүний бие бүрэн эдгэрсэн бололтой. Харин одоо тэрбээр“Байцаалтад” орох нь тодорхой. Учир нь энэ цаг үед УИХ төсвийн тодотголыг ид хэлэлцэж байгаа бөгөөд улсын өрийн хэмжээ хуулийн хязгаараас давсан асуудал олны анхаарлаас холдоогүй байна. Өөрөөр хэлбэл, түүний тэргүүлсэн Засгийн газар огцрох хүртлээ“Улсын өр хуулийн хүрээнд байгаа. Бүх зүйл сайн байна” гэсээр ирсэн. Гэтэл шинэ Засгийн газар байгуулагдаж, МАН Сангийн яамыг тэргүүлэх болсноор төсөв хөрөнгөтэй холбоотой бүх тоон мэдээлэл ил болоод байгаа. Харин энэ үеэр нэгэн ноцтой асуудал үүссэн нь улсын өрийн хэмжээ ДНБ-ий40 хувиас хэтрэхгүй байна гэсэн хуулийн заалт хэдийнэ зөрчигдсөн бөгөөд өдгөө60 хувьд дөхсөн байсан нь ил болсон. Үүнтэй холбоотойгоор МАН-аас өрийн хязгаар хэрхэн, ямар замаар хуулийн босго давсныг тодруулж, холбогдох хүмүүст хариуцлага тооцох ажлын хэсгийг байгуулаад байгаа. Товчхондоо, хэргийн эзнээр тухайн үеийн Сангийн сайд Ч.Улаан, Эдийн засгийн хөгжлийн сайд Н.Батбаяр нараас гадна Гүйцэтгэх засаглалыг тэргүүлж байсан Н.Алтанхуяг нар тодроод байгаа. Угаас үүнээс ч өөр гарцгүй. Улсын төсөв хөрөнгөтэй холбоотой бүх мэдээлэл дээрх гурван даргаас далдуур өрнөх учиргүй. Хэрвээ тэд өнгөрсөн хугацаанд УИХ-ын гишүүдэд төдийгүй ард түмэнд худлаа мэдээлэл өгч байсан бол хуулийн хариуцлага хүлээх учиртай. Ямартай ч экс Ерөнхйи сайд энэ бүх асуултад хариулт өгч, олон нийтэд “байцаагдах” цаг ирлээ.

Эх сурвалж: Unen.mn