Ерөнхий сайд Л.Оюун-Эрдэнийн тэргүүлсэн Засгийн газар Засгийн газрын бүтэц, бүрэлдэхүүний тухай хууль тогтоомжоор бүтцийн хувьд 14 яамтай, тохируулагч 12, хэрэгжүүлэгч 23 агентлагтай, танхимын бүрэлдэхүүний тухайд Ерөнхий сайд, Шадар сайд, Засгийн газрын Хэрэг эрхлэх газрын дарга болон асуудал эрхэлсэн нийт 17 гишүүнтэй ажиллахаар болсон билээ.1 сарын 29-нд УИХ-ын чуулганы нэгдсэн хуралдаанаар Засгийн газрын гишүүнийг томилох тухай Ерөнхий сайдын танилцуулгыг сонссон юм.
Монгол Улсын Үндсэн хуулийн 39 дүгээр зүйлийн 4 дэх хэсэг, Монгол Улсын Засгийн газрын тухай хуулийн 23 дугаар зүйлийн 2 дахь хэсгийг тус тус үндэслэн Монгол Улсын Засгийн газрын гишүүдээр томилохоор Улсын Их Хуралд танилцуулсан Ерөнхий Сайд Л.Оюун-Эрдэнийн шийдвэрээс олны хамгийн анхаарлыг татсан хүн бол 1992-2016 он хүртэл УИХ-ын гишүүн байсан, Хууль Зүй, Дотоод Хэргийн сайдаар дөрвөн удаа ажиллаж байсан, УИХ-ын даргаар ажиллаж байгаад Үндсэн хууль зөрчсөн нь тогтоогдон, огцорч байсан ч тав дахь удаага Засгийн Газрын гишүүн болж, Монгол Улсын Засгийн Газрын Хэрэг Эрхлэх Газрын Дарга, Монгол Улсын Сайдаар томилогдож буй Цэндийн Нямдорж байв.
Учир нь Засгийн Газрын Хэрэг Эрхлэх Газрын чиг үүргийг Засгийн Газрын тухай хуульд заахдаа: " Хэрэг эрхлэх газар нь нэгдүгээрт, Засгийн газрын шийдвэр боловсруулах, хэрэгжүүлэх, хоёрдугаарт, төрийн захиргааны төв болон нутгийн захиргааны байгууллагын харилцан ажиллагааг зохицуулахад туслах, гуравдугаарт, хүний нөөцийн удирдлага, дөрөвдүгээрт, нийтлэг үйлчилгээний удирдлагаар хангах асуудлыг эрхлэн гvйцэтгүүлэхээр" тогтоосон юм. Түүнчлэн ЗГХЭГ-ийн дарга, Монгол Улсын Сайд нь яг одоо ид өрнөж буй Оюутолгойн хөрөнгө оруулалтын гэрээ, далд уурхайн санхүүжилтийн төлөвлөгөөг засаж, сайжруулах асуудлыг тус тус хариуцаж буй билээ.
Гэтэл ийм хариуцлагатай ажилд томилогдож буй Ц.Нямдорж нь Оюутолгойн хөрөнгө оруулалтын гэрээг хамгаалагч гэдгийг улс төрийн хүрээнд сайн мэднэ.
Ц.Нямдорж ч үүнийгээ нуулгүй 2019 оны 11-р сард хэвлэлд өгсөн ярилцлагадаа: " Оюутолгойн гэрээ бол Монгол оронд барууны орнуудын хөрөнгө оруулалт хийгдэж байгаа, урьд өмнө хийгдэж байгаагүй, ирээдүйд үргэлжлэх анхны гэрээ. Энэ зөвхөн үйлдвэр биш улсын аюулгүй байдал, гадаад харилцаа гээд олон үр дагавартай гэрээ.Би Оюутолгойн гэрээг хамгаалж байгаа нь үнэн. Шүүхийн маргаанаас болж Монголыг хорлож болохгүй. Хамгийн аюултай нь Монгол Улс ганцаардах. Рио тинто гэдэг компани чадлаараа дэлхийд хоёрт жагсдаг. Энэ компанийн цаад талд Английн хатан хааныг дагасан улсууд байдаг. Энэ улсуудыг тойрсон Европын холбоо байгаа. Дэлхийн том банкууд байгаа." хэмээж байв.
Гэтэл Оюутолгойн гэрээг сайжруулна гэж аман дээрээ ярих Ерөнхий Сайд Л.Оюун-Эрдэнэ ямар учраас "Оюутолгойн хамгаалагч" Ц.Нямдоржийг Засгийн Газрынхаа хамгийн чухал албан тушаалд томилсон нь хачирхалтай.
Ц.Нямдорж нь УИХ, Засгийн Газар Оюутолгойн хөрөнгө оруулалтын гэрээг байгуулах үед С.Баярын удирдсан Засгийн Газрын гишүүн, УИХ-ын гишүүн, Хууль Зүй, Дотоод Хэргийн Сайд байсан бөгөөд мөн Н.Энхбаяр, Ц.Элбэгдорж, Сү.Батболд, У.Хүрэлсүх нарыг Ерөнхий Сайд байх үед Хууль Зүй, Дотоод Хэргийн Сайдаар ажиллаж байсан билээ. Ийм л намтар, холбоо хамааралтай хүн Оюутолгойн гэрээг өөрчлөх асуудал яригдаж буй нэн эгзэгтэй үед ЗГХЭГ-ийн дарга болж буй нь ердийн тохиолдол гэж үү?
Э.Мягмар
