Монгол Улс энэ оны төсөвтөө  уул уурхайн салбараас 3.4 их наяд төгрөг төвлөрүүлэх тооцоололтой. Эрдсийн экспортын гол хоёр нэр төрөлдөө найдлага тавьж, 42 сая тонн нүүрс, 1.4 сая тонн зэсийн баяжмал экспортод гаргах төлөвлөгөөтэй байгаа. Тооцоолол ийм байгаа хэдий ч экспортын голлох боомтууд хаагдсанаар 2021 онд уул уурхайгаас төвлөрүүлэх хэт өндөр төсөөлөл цаашид төсөв тасалдуулахад хүргэж болзошгүй байгаа юм.

Сануулахад, Өнгөрсөн онд 42 сая тонн нүүрс экспортлохоор баталсан оны сүүлд 28 сая гаруй тонныг гаргасан гэсэн тооцоолол байна. Тэгэхээр 2020 оны төсөвт тусгасан 42 сая тонн нүүрсний экспорт 14 орчим сая тонноор тасалджээ. Цаашлаад энэ оны тухайд ч БНХАУ-ын тал хилээ хааснаас экспорт доголдож, төсөв төсөөлөлдөө хүрэх боломжгүй болж байгаа юм.

Гашуунсухайт-Ганцмод боомтоор хэвийн үед 1000 гаруй тээврийн хэрэгсэл, Шивээхүрэн-Сэхэ боомтоор 500 машин нэвтэрдэг байсан. Тэгвэл боомтууд хааж, үйл ажиллагаа тасалдсанаар Гашуунсухайт-Ганцмод  боомтоор 60-80 машин  Шивээхүрэн-Сэхэ боомтоор 90-100 тээврийн хэрэгсэл нэвтэрч байгаа юм байна.

Эх сурвалж: Түмэн.мн