Ийм нэгэн ноцтой хэрэг гарчээ. 33 настай, цэргийн арын албаны мэргэжилтэй Б.Дөлгөөн нь нь 2022 оны 10-р сарын 27-ны өдрийн 20 цаг 50 минутын орчим Их дэлгүүрийн зүүн талд байрлах төлбөртэй зогсоолд хохирогч Ч.Түвшинбаярыг тээврийн хэрэгсэлдээ суухад нь “танд сиди бичлэг өгөөрэй гэсэн” гэж яриа эхлүүлэн түүний тээврийн хэрэгсэлд сууж хийн буу тулган 80,000,000 төгрөг өгөхийг шаардаж, түүний духанд буу тулгаж, чамд 80,000,000 төгрөг байхгүй бол энэ газар хамтдаа үхнэ гэж айлган сүрдүүлж сэтгэл санааны хүчирхийлэлд өртүүлэх зэрэг аргаар хүч хэрэглэхээр заналхийлсэн хэрэгт холбогджээ.

Болсон явдлын тухай тэрээр “... Би спортын бооцоот тоглоом буюу “Хбет”-д их хэмжээний мөнгө алдсан, мөнгөө олохын тулд бусдаас мөнгө зээлэх, өөрт байсан мөнгөө барьцаанд тавьж явсаар байгаад их хэмжээний өрөнд орсон. Гэмт хэрэг болсон өдрийн маргааш нь манай хүүгийн үс авах өдөр байсан. Тухайн өдөр өөртөө байсан таван сая орчим төгрөгөөрөө бооцоо тавьж бүгдийг нь алдаад яахаа мэдэхгүй ухаан санаагаа алдсан. Хохирогч гарч ирэхээр нь ажил дээр ашигладаг флаш дискийг танд өгөх гэсэн юм гэж хэлэхэд ямар хүн өгснийг баталгаажуулаад хоёулаа зургаа авхуулъя гэхээр нь машинд суусан. Тэгээд машинд сууж өрөвдүүлье гэж бодоод хорт хавдартай гэж худлаа ярьсан. Тэр бууг гаргаж ирээд өвөр дээрээ тавьж жинхэнэ буу шүү гэж хэлээд өөр үйлдэл битгий хийгээрэй гэж хэлсэн. Тэгэхэд эмчлэгдэхгүй өвчин биш шүү дээ, эмчлэгдэж болно гэсэн яриа өрнөсөн. Хамт явж байхдаа муухай харьцах үйлдэл гаргаагүй, явж байхдаа буруу зүйл хийж байна гэдгээ мэдээгүй. Буухаар араас орилоод баригдах байх гэж бодоод бууж чадахгүй яваад байсан, надаас юу хэрэгтэй юм гэж 3-4 асуусан. Мөнгө хэрэгтэй юу гэж ахин асуухаар нь 80 сая төгрөг хэрэгтэй гэж хэлсэн. Тэрнээс биш одоо надад мөнгө өг гэж хэлээгүй, чамд зохицуулж өгч чадна гэхдээ өнөөдөр биш өнөөдөр орой болчихлоо маргааш олж өгье гэж хэлсэн. Тэгээд буугаад явсан. Байрны гадаа 2-3 цаг тамхи татаж ганцаараа суусан. Өглөө хүүхдийн үс авах байсан учраас гэртээ орсон. Удалгүй цагдаа ирээд намайг барьсан...” гэжээ.

Харин хохирогч “...хар өнгийн саравчтай малгайтай, хар өнгийн арамтай шилтэй, шаргал өнгийн гадуур хувцастай, юүдэнтэй хар өнгийн цамц өмссөн 170-175 см өндөртэй эрэгтэй “танд зөөврийн флаш диск өгөх гэсэн юм” гэхээр нь би чамтай хамт зураг даруулж баримтжуулна гэж хэлсэн. Гэтэл нөгөө залуу машинд орж ирээд үгийн зөрүүгүй халааснаасаа галт зэвсэг бололтой /гар буу/ зүйл гаргаж ирээд зургаан хүүхдэдээ хайртай юу гэж хэлээд халааснаасаа гар утас гаргаж хээр буугаар буудаж байгаа бичлэг үзүүлсэн. Тэгээд "би тархины хорт хавдартай гурван сарын настай” гэж хэлээд надад алдах зүйл байхгүй. Энэ буу долоон сумтай, миний хэлсэнээр байгаарай гэж сануулсан. Хөдөл гэхээр нь төв зам руу орж Зайсан чиглэлд явсан. Замдаа хүсэж байгаа зүйлийг нь тодруулж асуухад “надад хүсэх зүйл байхгүй бас алдах зүйл байхгүй” гэсэн. Машины цонх онгойлгож буугаар гадагш хий буудаж үзүүлсэн. Буун дуу нь жинхэнэ бололтой сонсогдож байсан. Мөн сум нь зэс шиг шаргал өнгөтэй бодит юм шиг харагдсан. Би “Зайсан скүэр” -ийн хажуу талын замаар орж Энхтайваны гүүр давсан. Нөгөө эрэгтэй гадуур хувцасны дотор талдаа над руу буу чиглүүлсэн айлган сүрдүүлсэн байдалтай явсан. Миний гар утасны мөнгөн гуйвуулга хийдэг “Most money” апп руу нэвтэрч дансны мэдээлэл шалгасан. “Happy residence” хотхоны дэргэд тэр “”чи надад хэдэн төгрөг өгч чадах вэ” гэхээр нь би хоёр сая гэсэн. Тэгэхэд машиныг унтрааж, дух хэсэгт буу тулган энэ газарт хамт үхнэ. Надад 80 сая хэрэгтэй гэж хэлсэн. Нөгөө эрэгтэй буугаа тулгаад байхаар нь би 80 саяыг өгч чадна, буугаа буулгачих гэж хэлсэн. ...Би тэр даруйд нь машинаас буугаад гүйж байгаад эргээд хартал араас хөөж харагдсан. Хашаанаас эрэгтэй хүн гараад ирэхээр нь тусламж гуйгаад буутай хүн хөөгөөд байна гэж хэлсэн...” гэжээ.

Хохирогчид тулгасан буу нь Герман улсад бие хамгаалах зориулалттай үйлдвэрлэгдсэн 9 мм-ийн калибрын COMBAT-PP загварын гадаад хэлбэр хийц, ажиллах зарчмын хувьд галт зэвсэгтэй төсөөтэй хийгдсэн тусгай хэрэгсэл агаад хэдийгээр галт зэвсэг биш ч галт зэвсэгтэй адилтгах хэрэгсэлд хамаардаг аж. Шүүх буу тулгагчийг 15 сая төгрөгөөр торгожээ.