Хөгжлийн банкны өнөөдрийн дампуурлын эх суурийг тавьсан хүмүүсийн нэг нь яах аргагүй Н.Алтанхуяг мөн. Тийм ч учраас орох байх газраа олж ядан, өөрийгөө өмгөөлж болох бүх хувилбарыг ашиглаж байгаа ч ямар ч үр дүн алга. УИХ-ын гишүүний бүрэн эрхийг хөндөхөөс өөр аргагүй боллоо. Үнэхээр Хөгжлийн банкны асуудлыг шалгаж байгаа бол Н.Алтанхуягаас эхлэх нь зүй ёсны хэрэг.
Тэгэхээр чухам яагаад Н.Алтанхуягаас эхлэх ёстой гэсэн асуулт зүй ёсоор гарч таарна. Тэгвэл Хөгжлийн банк нь БНСУ-ын Хөгжлийн банктай хамтран ажиллах гэрээг 2011 оны наймдугаар сарын 30-нд байгуулж, солонгосчууд таван мэргэжилтнээ өөрийн зардлаар Монгол руу илгээж байжээ. Тодотговол, энэ талын мэргэшсэн туршлагтай баг манай улсын Хөгжлийн банкыг босгож өгөхөөр ирж байна гэсэн үг. Улмаар тус банк нь анх удаа 2011 оны арваннэгдүгээр сарын 30-д 20.0 сая ам.долларын, 2012 оны гуравдугаар сард 580.0 сая ам.долларын, 5.75 хувийн хүүтэй бондыг олон улсын зах зээлд тус тус амжилттай гаргасан юм.
Ийнхүү ном дүрмээрээ ажиллаж байсан банкы хамтрагчдыг Ерөнхий сайдаар ажиллаж байсан Н.Алтанхуяг хөөж гаргасан. Тодотговол тэрбээр “Хөгжлийн банкны үйл ажиллагаа жигдэрсэн, одоо алзахгүй” хэмээн дөвчигнөж, 2013 оны тавдугаар сарын 25-нд Солонгостой байгуулсан гэрээг цуцлав. Тухайн үед Н.Алтанхуяг Хөгжлийн банкыг хэтэвчээ болгох гэхээр солонгосчууд хэтэрхий номын загнаж, саад болсон учраас ийнхүү “хөөж туусан” нь тодорхой. Энэхүү гэрээг цуцлан, өнөөх алдарт “Чингис” бондоо босгоод авснаар банкны дампуурлын суурь тавигдсан. Учир нь тухайн үеийн Эдийн засгийн хөгжлийн сайд Н.Батбаярын бөөлж байж авчирсан гэх 1.5 тэрбум доллароо юунд зарцуулах төлөвлөгөө, тооцоо боловсруулаагүй учраас самарч эхэлсэн. Бондын мөнгийг ямар ч зорилгогүй, ямар ч төсөл төлөвлөгөө, бодлогогүй оруулж ирсэн. Мөн төсөл зураггүй, барьцаагүй тараах эхлэл ийн тавигдсан гэдгийг хэн бүхэн мэднэ.
Хөгжлийн банкны тухайн үеийн захирал Н.Мөнхбат, Эдийн засгийн хөгжлийн сайд асан Н.Батбаяр, УИХ-ын гишүүн асан Б.Гарамгайбаатар нарын олон хүн шүүхийн хаалга татсан ч гэм зэмгүй явж байна. Гэтэл жинхэнэ бүх хэргийн том эзэн Н.Алтанхуягаа шалгахгүй байгаад хаа хаанаа гайхаж байсан. Харин өнөөдөр энэ бүхэн зөв гольдиролдоо орж, түүний бүрэн эрхийг түдгэлзүүлж шалгахаар болсонд учир мэдэх бүхэн баяртай байна. Хөгжлийн банкны түүх, өнгөрөгч 10 гаруй жилийн нөхцөл байдлаас харахад зөвхөн Н.Алтанхуяг бус энэ үед эрх мэдэл бүхий алба хашиж байсан нөхдийг бүгдийг нь шалгах хэрэгтэй. Тэр тусмаа бүх зүйлийг мэдэж байсан, Гүйцэтгэх засаглалын тэргүүн байсан нөхрөөс эхлэх нь банкны асуудлыг шийдэхэд маш хялбар байх болно. Ард түмэн ч өнөөдрийн нийгэм, улс төрийн амьдрал зөв зүг рүү чиглэж, үүнийг зөв зүгт залж яваа Засгийн газрын тэргүүн Л.Оюун-Эрдэнэ, Хууль зүй, дотоод хэргийн сайд Х.Нямбаатар нарын шударга залууст талархаж байна.
Tumen.mn
