Уг нь УИХ-ын сонгуулийн  60, 61 дугаар тойрог буюу Сүхбаатар, Багануур дүүргийн тойрог л доо. Гэвч нэр дэвшигчдээс нь хамаарч уг тойргийг “тагнуулчдын тойрог” хэмээн нэрлээд байгаа юм.

Тухайлбал, УИХ-ын 60 дугаар тойрог болон Сүхбаатар дүүргийн 7, 8, 9, 10 дугаар хороо, Багануур дүүргийн нэгдүгээр хороонд АН-аас УИХ-ын гишүүн Х.Тэмүүжин, МАН-аас Хууль зүйн сайд асан Ц.Мөнх-Оргил нар өрсөлдөхөөр болж.

Харин УИХ-ын 61 дүгээр тойрог буюу Сүхбаатар дүүргийн 11, 12, 13, 14 дүгээр хороо, Багануур дүүргийн 5 дугаар хороонд АН-аас УИХ-ын гишүүн М.Батчимэг, МАН-аас УИХ-ын гишүүн Сү.Батболд нар нэр дэвших эрхээ авч, өрсөлдөхөөр болоод байгаа.

Тэгвэл АН-ын Х.Тэмүүжин, М.Батчимэг нар “тагнуулч” хэмээх нэрийг зүүх болсон. Тиймээс л УИХ-ын 60, 61 дүгээр тойргийг “тагнуулчдын тойрог” гэж нэрлээд байгаа ойлгоно биз.

Тодруулбал, УИХ-ын гишүүн, Х.Тэмүүжин Хууль зүйн сайд байхдаа Монгол Улсын дотоод хэрэгт хамааралтай мэдээ, мэдээллийг дамжуулдаг байсан тухай Wikileaks сайтыг  үндэслэгч  Жулиан Ассанж өөрийн сайтдаа байршуулан олон нийтэд хүргэсэн байдаг. Гэхдээ энэ асуудлыг манай хуулийн байгууллагынхан шалгаж хүндрүүлээгүй. Учир нь Хууль зүйн сайдын албан тушаалтай холбоотой болов уу гэж таамаглаж байна.

Тэгвэл УИХ-ын гишүүн М.Батчимэгийн зөвлөх З.Пагмажав нь Эрүүгийн хуулийн 79.1 буюу “Төрийн нууцыг гадаад улсын тагнуулын албанд шилжүүлэн өгсөн” гэх үндэслэлээр буруутгагдаж, шүүхээс ял сонссон байдаг. Туслах нь тагнуулч байсныг шүүх тогтоосон байхад гишүүн уснаас хуурай гарч байгаа нь бас албан тушаалтай л холбоотой болов уу гэж таамаглахаас аргагүй.

Тэгвэл ийм хүмүүс нэг нь тойргоо сольж, нөгөө нь тойрогтоо “гологдож” Сүхбаатар дүүрэгт нэр дэвших болсоноор тус дүүргийг УИХ-ын сонгуулийн “Тагнуулчдын тойрог” болгон хувиргаад байна.

А.Аюуш

Ugluu.mn