Соёл, спорт, аялал жуулчлалын яамыг татан буулгасан талаар тус яамыг толгойлсон сайд Ц.Оюунгэрэл их л гомдолтой яваа ажээ. Сүүлийн хоёр жил гаруй хугацаанд энэ яам шинээр байгуулагдаж, үлэг гүрвэлийн яс дамлан худалдаалагчдыг илрүүлэх, Т.Батаарын музей нээх, спортын дэлхийн шилдэгүүдийг тодруулах гээд олон чиглэлээр ахиц амжилт гаргасан гэж тэр хэлж байна. Гэвч  ажлыг нь үнэлж цэгнэлгүйгээр шууд татан буулгасан нь улс төрийн хуйвалдаан хэмээн үзэж буй ажээ. Тэрбээр сэтгүүлчдэд өгсөн мэдээлэлдээ “Сүүлийн дөрвөн сарын турш нэг яамыг байхгүй болгох хуйвалдаан явлаа. МАН-ынхан өнгөрсөн 10 дугаар сард бүтцийн өөрчлөлтийн талаарх саналдаа тусгаж оруулж ирсэн байсан. Ингээд салбараараа улс төрийн хохирогч болчихлоо” гэжээ. Хуучин Лениний музейг Т.Батаарын музей болгож, төрд буцааж авах талаар МАН-ынхантай хамгийн их тулаан хийсэн хүн бол яах аргагүй Ц.Оюунгэрэл сайд байсан болов уу. Уг музейд хадгалагдаж байсан үнэт өв соёлын бүтээлүүд бүгд байхгүй болсон гэдэг. Учрыг асуухад уг музейг эзэмшиж байсан Нийслэлийн МАН-ын удирдлагууд нь “Галд шатсан” гэхээс өөрийг эс хэлдэг ажээ. Мөн тус музейг Алтжин компанийн эзэн Г.Алтанд нэг тэрбум төгрөгөөр барьцаалсан, газрынх нь талыг   У.Хүрэлсүхийн удирдаж байсан МАН-ын Зүүний хүчний холбооны нэр дээр шилжүүлсэн зэрэг маргаантай  асуудлууд одоо ч бүрэн шийдэгдээгүй байна.

Б.Отгонбаяр  

Tumen.mn