Улаанбаатар төмөр замын Тээвэр зохицуулалтын газрын орлогч дарга С.Батдөлийн гэрээс 7.3 тэрбум төгрөгийг Эрүүгийн цагдаагийн газраас илрүүлсэн. Албан бус мэдээллийн мөрөөр ороход энэ мөнгө Сангийн сайд Б.Жавхлан “Улаанбаатар” төмөр замын дарга Х.Хэрлэн нарынх гэдгийг хэлсэн.

Мөн нэг шинэ мэдээлэл байгаа нь Б.Жавхлан Дархан дахь өөрийн мэдлийн “DBS” телевизийн захирал Н.Энхтунгалагийн нэр дээр БНХАУ-ын эдийн засгийн тусгай бүс Хонгконгт оффшор "Вагон Импекс" компани байгуулсан бөгөөд түүгээрээ мөнгө угааж, анх 250 ширхэг тавцан вагон оруулж ирсэн байдаг. Үүний зөвшөөрлийг Х.Хэрлэн дарга өгчээ. Энэхүү 250 опентоп тавцан вагон нь нэг сард тус бүр 4-5 удаа эргэдэг гэхээр үүний төлбөрийн нэгээхэн хэсэг нь С.Батдөлийн гэрээс олдсон бололтой.

Ийнхүү цар тахал хилийн хориг далимдуулан, мөнгө хүүдийлж байсан Б.Жавхлангийн бүлэглэлийн ажиллагаа өргөжиж, ачаа тээврээс ахиухан мөнгө босгосон учраас Таван толгой-Зүүнбаян чиглэлийн төмөр замаар нүүрс зөөн, БНХАУ-руу гаргах төлөвлөгөө боловсруулж, өөрийн хамаарал бүхий этгээд болох З.Бат-Үнэнгийн эзэмшил газарт Х.Энхжаргалын нэр дээр “Чин засагт” компани байгуулан, Замын-Үүд өртөөний сэлгээний замыг 1.2 километрээр өргөтгөн, улмаар түүнээсээ хоёр километр орчим салаалан өөрсдийн гэсэн нүүрс ачиж буулгах талбайг байгуулж байгаа гэх санаанд багтамгүй мэдээллийг ч өглөө.

Нийт 3.5 километр төмөр замын өнөөгийн үнэлгээ нь нэг километр тутамд хоёр сая ам.доллар гэж бодохоор нийт үнэ нь долоон сая ам.доллар орчим болно. Энэхүү зам нь аюулгүй ажиллагааны дүрэм журам зөрчин баригдсан нь хэн нэгэн эрх мэдэлтэн, бүр бүлэглэлийнх гэдгийг илтгэнэ. Ингэхдээ 50 гаруй тусгай зөвшөөрөл лиценз, зураг төслийг гажуудуулжээ. Шударга ёсны туг мандуулж, “Таван Ш” ажиллагаа эхлүүлээд байгаа Засгийн газар танхимынхаа сайдад анхаарахгүй бол чухам юу болж байгааг батлан хэлэхэд хэцүү боллоо.

ҮРГЭЛЖЛЭЛ БИЙ .....

Tumen.mn